ऊर्जा खबर
काठमाडौं । साहस ऊर्जा कम्पनीको सेयर आवेदन खुल्ला भएको छ । कम्पनीले सोलुखुम्बुमा निर्माणाधीन ८६ मेगावाटको सोलु खोला (दुधकोसी) जलविद्युत आयोजनाको स्थानीयका लागि छुट्याएको सेयर आवेदन खुल्ला भएको हो ।
सय रुपैयाँ मुल्यमा अंकित ३५ करोड रुपैयाँ बराबरको ३५ लाख कित्ता सेयर निष्कासन गरिएको कम्पनीले जनाएको छ । कम्पनीका अनुसार पहिलो चरणमा स्थानीयका लागि छुट्याएको सेयर निष्कासन गरिएको हो ।
स्थानीयले छिटोमा भदौ ११ गतेसम्म र ढिलो भदौ २७ गतेसम्म आवेदन दिन सक्नेछन् । स्थानीयले न्युनतम १० कित्तादेखि अधिकतम १० लाख ५० हजार कित्तासम्मका लागि आवेदन दिन सक्नेछन् ।
स्थानीयले ग्लोबल आईएमईको सल्लेरी, नेपाल इन्भेष्टमेन्टको लुक्ला, लक्ष्मी बैंकको मुग्ली र नेले शाखा, माछापुच्छ्रेको सल्लेरी, सोलुखुम्बु र प्राइम कमर्शियलको रमिते शाखाबाट आवेदन दिन सक्नेछन् । साथै, नेपाल धितोपत्र बोर्डबाट स्वीकृत प्राप्त गरेका सम्पूर्ण सी–आस्वा सदस्या बैंक तथा वित्तीय संस्था र तिनका शाखा कार्यालयबाट पनि आवेदन दिन सकिनेछ ।
स्थानीयका लागि छुट्याएको सेयर निष्कासन पुरा गरी बाँडफाँड गरिसकेपछि सामूहिक लगानी कोष, कम्पनीमा कार्यरत कर्मचारी र सर्वसाधारणका लागि ७० करोड रुपैयाँ मूल्यको ७० लाख कित्ता सेयर निष्कासन गर्ने कम्पनीको तयारी छ ।
कम्पनीको सेयर निष्कासन गरी बाँडफाँड गर्ने जिम्मेवारी एनआइबिएल एस क्यापिटलले पाएको छ । कम्पनीले इकरा नेपालबाट ‘बि बि प्लस’ रेटिङ पाएको छ । कम्पनीको सेयर प्रत्याभूतिकर्ता नागरिक लगानी कोष रहेको छ ।
आयोजनाको ७४ प्रतिशत निर्माण सम्पन्न भइसकेको छ । आयोजनामा नेपाल इन्भेष्टमेन्ट बैंकको अगुवाईमा ९ बैंकले लगानी गरेका छन् ।
