ऊर्जा खबर
काठमाडौं । रावा इनर्जी डेभलपमेन्ट लिमिटेड र भूगोल इनर्जी डेभलपमेन्ट कम्पनी लिमिटेडले चैत २३ गतेदेखि साधारण सेयर निष्कासन गर्ने भएको छ । कम्पनीले आयोजना प्रभावित स्थानीय, वैदेशिक रोजगारीमा गएका नेपाली नागरिक र सर्वसाधारणका लागि लागि छुट्याएको सेयर निष्कासन गर्न लागको हो ।
जारी पूँजी २८ करोडको ३० प्रतिशत अर्थात सय रुपैयाँ अंकित ८ लाख ४० हजार कित्ता साधारण सेयरमध्ये जारी पूँजीको १० प्रतिशत अर्थात २ लाख ८० हजार कित्ता साधारण सेयर आयोजना प्रभावित खोटाङ जिल्लाको केपीलासगढी गाउँपालिका (साविक फेदी, खार्ताम्छा, वास्पानी, बाक्सिला, सप्तेश्वर, दिप्सुङ र सुङ्देल गाविस) का सम्पूर्ण वडाका बासिन्दाहरुका लागि निष्कासन गर्न लागेको कम्पनीले जनाएको छ । कम्पनीका अनुसार वैदेशिक रोजगारीमा गएका नेपाली नागरिकका लागि निष्कासित सेयरको १० प्रतिशत अर्थात ५६ हजार कित्ता सेयर निष्कासन गर्न लागेको हो ।
स्थानीयले न्यूतम १० कित्तादेखि अधिकत्तम १० हजार कित्ता सम्म आवेदन दिन पाउनेछन् भने वैदेशिक रोजगारीमा गएका नेपाली नागरिकले १० कित्तादेखि २८ सय कित्ता सम्म आवेदन दिन पाउनेछन् । स्थानीयले छिटोमा बैशख ७ गतेसम्म र ढिलोमा २२ गतेसम्म आवेदन दिन सक्नेछन् भने वैदेशिक रोजागारीमा गएका नेपाली नागरिककले बैशाख ७ गतेसम्म मात्र आवेदन दिन सक्नेछन् ।
कम्पनीको सेयर निष्कासन गरी बाँडफाँड गर्न प्रभू क्यापिटल लिमिटेडलाई बिक्री प्रबन्धक चयन गरेको छ । कम्पनीको खोटाङमा ३ मेगावाटको रावा खोला साना जलविद्युत आयोजना सञ्चालनमा छन् भने २.५ मेगावाटको मध्य रावा खोला जलविद्युत आयोजना निर्माणाधीन छन् । सञ्चालनमा रहेको आयोजनाको कुल लागत ६४ करोड ६५ लाख रहेको छ ।
यसैगरी, भूगोल इनर्जी डेभलपमन्ट कम्पनी लिमिटेडले १३ करोड ४६ लाख ९९ हजार ३ सय रकम बराबरको सय रुपैयाँ अंकित १३ लाख ४६ हजार ९ सय ९३ किता साधारण सेयर सर्वसाधारणका लागि निष्कासन गर्ने तयारी गरेको छ । कम्पनीले पहिलो चरणमा प्रभावित स्थानीय र वैदेशिक रोजागरीमा गएका नेपाली नागरिकका लागि सेयर निष्कासन तथा बाँडफाँड गरी दोस्रो चरणमा सर्वसाधारणका लागि निष्कासन गर्न लागेको हो ।
सर्वसाधारणले न्यूनतम १० कित्तादेखि अधिकत्तम ३० हजार कित्तासम्म आवेदन दिन पाउनेछन् । कम्पनीको सेयर निष्कासन गरी बाँडफाँड गर्न एन आई सी एशिया कयापिटल लिमिटेडलाई बिक्री प्रबन्धक तोकिएको छ । आवेदकले छिटोमा चैत २७ गतेसम्म र ढिलोमा बैशाख ७ गतेसम्म आवेदन दिन पाउनेछन् ।
कम्पनीको दैलेख जिल्लामा ३.७५ मेगावाटको द्वारी खोला जलविद्युत आयोजना सञ्चालनमा छ । उक्त आयोजना कुल लागत ७३ करोड १९ लाख ७८ हजार ८०८ रुपैयाँ रहेको छ ।
