ऊर्जा खबर
काठमाडौं । वैदेशिक रोजगारीमा रहेका नेपालीले सुपर मादी जलविद्युत आयोजनाकाे सेयर आवेदन दिने आज अन्तिम दिन हो । कम्पनीले कास्कीमा निर्माणाधीन ४४ मेगावाटको सुपर मादी जलविद्युत आयोजनाको विदेशमा रहेका नेपाली नागरिकका लागि छुट्याएको सेयर आवेदन खुल्ला अवधि आज (मंगलबार) साँझबाट सकिन लागेको हो ।
सुपर मादी हाइड्रो पावर लिमिटेडले वैदेशिक रोजगारीमा रहेकाहरूको लागि २ लाख १० हजार कित्ता सेयर निष्कासन गरेको छ । कम्पनीले सर्वसाधारणका लागि छुट्याएको २१ लाख कित्तामध्ये १० प्रतिशत अर्थात २ लाख १० हजार कित्ता सेयर नेपाल सरकारको सम्बन्धित निकायबाट श्रम स्वीकृति प्राप्त गरी विदेशमा रोजगारी गरिरहेको नेपालीहरूका लागि छुट्याएको हो ।
यस्तै, कम्पनीले आयोजना प्रभावित स्थानीयका लागि सय रुपैयाँ अंकित १० करोड ५० लाख रुपैयाँ बराबरको १० लाख ५० हजार कित्ता सेयर निष्कासन गरेको छ । कम्पनीका अनुसार निष्कासीत सेयरमध्ये आयोजना अति प्रभावित क्षेत्र जिल्लाको मादी गाउँपालिकाको वडा नम्बर १ र २ का स्थानीयका लागि ३ लाख १५ हजार कित्ता र अन्य वडा नम्बर ३, ४, ५, ६, ७, ८, ९, १०, ११, १२ तथा पोखरा महानगरपालिकाको वडा नम्बर २६, २७ र २८ का स्थानीयका लागि ७ लाख ३५ हजार कित्ता छुट्याइएको छ ।
स्थानीयले ढिलोमा २० गतेसम्म आवेदन दिन सक्ने कम्पनीले जनाएको छ । कम्पनीका अनुसार माग भन्दा बढी आवेदन आएमा निर्धारित तालिका अगावै निष्कासन तथा बिक्री बन्द गरिनेछ ।
कम्पनीका अनुसार दुवैले न्यूनतम १० कित्तादेखि अधिकतम ५० हजार कित्तासम्म आवेदन दिन सक्नेछन् । कम्पनीको सेयर निष्कासन गरी बाँडफाँड गर्न सानिमा क्यापिटल लिमिटेडलाई बिक्री प्रबन्धत तोकिएको छ ।कम्पनीले निर्माण गरिरहेको आयोजनाको काम अन्तिम चरणमा पुगेको छ ।
