ऊर्जा खबर
काठमाडौं । नेपाल विद्युत प्राधिकरणले मोरङको टंकिसिनुवारीबाट विद्युतका कंक्रिट पोल उत्पादन सुरु गरेको छ । प्राधिकरणको इन्जिनियरिङ सेवा निर्देशनालयको ‘कंक्रिट पोल प्लान्ट आयोजना’ अन्तर्गत टंकिसिनुवारीमा प्लान्ट निर्माण गरी पोल उत्पादन सुरु गरिएको हो ।
अहिले प्लान्टले कंक्रिटका पोलको परीक्षण उत्पादन गरिरहेको निर्देशनालयले जनाएको छ । प्लान्टबाट विद्युत वितरणमा प्रयोग हुने ८, ९ र ११ मिटरका कंक्रिटका पोल उत्पादन हुनेछन् । १४ करोड ५० लाख रुपैयाँ लागतमा निर्माण गरिएको प्लान्टले वार्षिक ३३ हजार ५ सय ८० कंक्रिट पोल उत्पादन गर्नेछ ।
इन्जिनियरिङ सेवा निर्देशनालयका उपकार्यकारी निर्देशक मनोज सिलवालले शुक्रबार प्लान्टको निरीक्षण गरी नियमितरूपमा पूर्ण क्षमतामा पोल उत्पादन सुरु गर्न निर्देशन दिएका छन् । उनले प्लान्टबाट पोल उत्पादन सुरु भएपछि टाढाबाट पोल ल्याउँदा लाग्ने ढुवानी खर्च र समय बचत बताए ।
कोरोना (कोभिड–१९) महामारीको नियन्त्रण तथा रोकथाकका लागि लगाइएको निषेधाज्ञा र भारतबाट मालसामान तथा प्राविधिक आउन ढिलाई हुँदा प्लान्टबाट परीक्षण उत्पादन तालिकाभन्दा केही ढिलो गरी सुरु भएको आयोजना प्रमुख परमार धीरसेनले बताए ।
उनले परीक्षण उत्पादनका क्रममा प्राविधिक समस्या नआएमा प्लान्ट केही दिनभित्र नै पूर्ण क्षमतामा चलाउने उनले बताए । प्लान्टबाट उत्पादित पोलहरू मुख्य गरी प्रदेश–१ र र २ का जिल्लामा आपूर्ति गरिने प्राधिकरणले जनाएको छ । प्राधिकरणले अहिले तनहुँको कोत्रे र पर्साको अमलेखगञ्जबाट कंक्रिट पोल उत्पादन गर्दै आएको छ भने कैलालीको लम्कीमा प्लान्ट निर्माणाधीन छ ।
