ऊर्जा खबर
काठमाडौं । पाँचथर पावर कम्पनी लिमिटेडको उत्पादन आम्दानी घटेसँगै खुद नाफा पनि घटेको छ । कम्पनीले सार्वजनिक गरेको वित्तीय विवरण अनुसार आर्थिक वर्ष (आव) २०७९/८० को तेस्रो त्रैमासमा खुद नाफा घटेको देखिएको हो ।
कम्पनीले साउनदेखि चैतसम्मको अवधिमा ८ करोड ६० लाख ६५ हजार रुपैयाँ खुद नाफा कमाएको सार्वजनिक वित्तीय विवरणमा उल्लेख छ । कम्पनीको नाफा गत वर्षको तुलनामा घटेको हो । गत वर्ष यही समयअवधिमा १३ करोड ९१ लाख ११ हजार रुपैयाँ नाफा कमाएको थियो ।
कम्पनीले यो अवधिमा जलविद्युत केन्द्रको विद्युत बिक्री गरी २९ करोड ४२ लाख ३३ हजार रुपैयाँ आम्दानी गरेको छ । कम्पनीले गत वर्ष ३१ करोड ८२ लाख १७ हजार रुपैयाँ आम्दानी गरेको थियो ।
कम्पनीले अन्य स्रोतबाट पनि १७ लाख ५६ हजार रुपैयाँ आम्दानी गरेको छ । यस आयोजनाबाट उत्पादित विद्युत विगत भन्दा त्रैमासमा खोलाको पानीको प्रवाहमा कमी हुने भएकोले आम्दानीमा उल्लेख्य वृद्धि हुन नसकेको कम्पनीले जनाएको छ । कम्पनीको पाँचथरमा १४.९ मेगावाटको हेवा खोला–ए जलविद्युत आयोजना सञ्चालनमा छ ।
