१० महिनामा सेती नदीको २५ मेगावाट विद्युत प्रणालीमा थपिँदै

काठमाडौं । कास्कीको माछापुच्छ्रे गाउँपालिकामा निर्माणाधीन २५ मेगावाटको सेती नदी जलविद्युत आयोजनाले अबको १० महिनाभित्र उत्पादन सुरु गर्ने भएको छ । प्रवर्द्धक भिजन लुम्बिनी ऊर्जा कम्पनीले निर्माण गरिरहेको आयोजनाले २०७९ चैतदेखि विद्युत उत्पादन सुरु गर्ने भएको हो ।

आयोजनाको बाँध, पाइप लाइन र विद्युतगृहका संरचना निर्माणको काम तिव्र गतिमा अघि बढेको आयोजना प्रमुख लेखनाथ पाण्डेले बताए । उनका अनुसार बाँध क्षेत्रमा काम सकिएको छ ।

‘६.२ किलोमिटर लामो पेनस्टक पाइपलाइनको काम ६० प्रतिशत सकिएको छ’, उनले भने, ‘पाइपलाइनको पाइप बिछ्याउने काम भइरहेको छ, बाँकी काम २०७९ को माघभित्र पूरा गरिनेछ ।’ विद्युतगृहको सिभिल संरचना र इलेक्ट्रोमेकानिल बेसको काम भइरहेको छ । विद्युतगृहको जग खन्ने काम सकिएको छ ।

विद्युतगृहबाट विद्युत उत्पादन भई निकास हुने पानी फेरि नदीमा खसाल्ने टेलरेस पाइपलाइन निर्माणको काम पनि भइरहेको छ । आयोजनाको सबै काम पूरा गरेर आगामी २०७९ चैतभित्र विद्युत उत्पादन गर्ने लक्ष्य छ । आयोजनाको काम २०७७ साउनदेखि सुरु भएको हो ।

प्राधिकरणले दिएको तालिकाअनुसार यो आयोजनाबाट २०७९ साल भदौदेखि विद्युत उत्पादन सुरु गर्ने लक्ष्य थियो । सरकारले कोरोना महामारीका कारण ढिलो भएका आयोजनाको निर्माण अवधि १ वर्ष थप गरिदिएकाले अब २०८० साल भदौदेखि विद्युत  उत्पादन सुरु गर्ने नयाँ तालिका पाएको कम्पनीले जनाएको छ ।

तर, एक वर्षको सयमअवधि थप गरेपनि आयोजना आगामी चैत्रभित्र  पूरा गर्ने लक्ष्यका साथ काम भइरहेको पनि पाण्डेले बताए । आयोजनाबाट उत्पादन भएको विद्युत ५ किलोमिटर दुरीमा रहेको प्राधिकरणको लाहाचोक सबस्टेसनमा जोडिनेछ । सबस्टेसनसम्मको आवश्यक १३२ केभी डबल सर्किट प्रसारण लाइन कम्पनी आफैले निर्माण गर्नेछ ।

लाइन निर्माण गर्न जेड इन्फ्रा प्रालिसँग सम्झौता भएको छ । यसअघि लाइन सिंगल सर्किटमा निर्माण गर्न अनुमति प्राप्त गरेकोमा आयोजनाको तलमाथि निर्माणाधीन केही आयोजनाले पनि यही लाइनमार्फत विद्युत राष्ट्रिय प्रसारण लाइनमा जोड्ने भएपछि डबल सर्किटमा निर्माण सुरु गरिएको छ ।

प्रसारण लाइन निर्माण गर्न जग्गा किन्ने र अध्ययन प्रतिवेदन तयार गर्ने काम सकिएको छ । लाइनको टावर जग खन्ने काम भइरहेको छ ।
आयोजना सम्पन्न गर्न ५ अर्ब रुपैयाँ लागत अनुमान गरिएको छ । आयोजनामा एनएमबी बैंकको अगुवाईमा कर्मचारी संचय कोष र कृषि विकास बैंकले ७० प्रतिशत ऋण लगानी गरेका छन ।

एनएमबीले २ अर्ब २० करोड, कर्मचारी संचय कोषले ८० करोड र कृषि विकास बैंकले ५० करोड रुपैयाँ ऋण लगानी गरेका छन । बाँकी ३० प्रतिशत अर्थात १ अर्ब ५० करोड रुपैयाँ स्वपुँजी लगानी छ ।

विद्युत प्राधिकरणले यो आयोजनाको विद्युत हिउँदमा प्रतियुनिट ८.४० रुपैयाँ र बर्खामा ४.८० रुपैयाँमा किन्ने गरी विद्युत खरिद सम्झौता (पिपिए) गरेको छ ।