ऊर्जा खबर
काठमाडौं । बैंक अफ काठमाडौंले २ सौर्य विद्युत आयोजनामा एकल लगानी गर्ने भएको छ । बैंकले अपि पावर कम्पनीले निर्माण गर्न लागेका १–१ मेगावाटका ढल्केबर र सिमरा सौर्य विद्युत आयोजनामा ११ करोड २० लाख रुपैयाँ लगानी गर्न लागेको हो ।
दुवै सौर्य विद्युत आयोजनामा ऋण लगानी गर्न बैंकसँग अघिल्लाे साता सम्झौता गरेको कम्पनीका प्रबन्ध निर्देशक सन्जीव न्यौपाने बताए । उनका अनुसार बैंकले दुवै सौर्य विद्युत आयोजनामा कूल लागतको ७० प्रतिशत लगानी गर्ने प्रतिबद्धता जनाएको छ ।
‘हामीले अघि बढाएको ४ मेगावाटको आयोजनामा यही बैंकले एकल ऋण लगानी गरेको छ,’ उनले ऊर्जा खबरसँग भने, ‘अब निर्माणमा जाने २ सौर्य विद्युत आयोजनामा पनि प्रतिआयोजना ५ करोड ६० लाख रुपैयाँ ऋण प्रवाह गर्ने गरी बैंकसँग सम्झौता भएको छ।’
दुवै आयोजना सम्पन्न गर्न प्रतिमेगावाट ८ करोड रुपैयाँ लागत अनुमान गरिएको छ । ऋण बाहेकको ३० प्रतिशत स्वपुँजी लगानी हुनेछ । उनले चालू आर्थिक वर्षभित्र दुवै सौर्य विद्युत आयोजनाको निर्माण सुरु गरिने बताए । निर्माण सुरु गरेको ५ देखि ६ महिनामा सौर्य विद्युत आयोजना राष्ट्रिय प्रसारण प्रणालीमा जोड्ने योजना छ ।
यी आयोजनाको विद्युत ढल्केबर र सिमरा सबस्टेसनमा जोडिने छ । अपि पावर कम्पनीले नै निर्माण गरिरहेको ४ मेगावाटको चन्द्रनिगाहपुर सौर्य विद्युत आयोजना बैशाखमा राष्ट्रिय प्रणालीमा जोडिँदैछ ।
निर्माण सुरु गरेको ६ महिनामा आयोजना सम्पन्न भई विद्युत उत्पादन हुन लागेको हो । १२ बिघा क्षेत्रफलमा ४ सय ५० वाटका ११ हजार १ सय १२ वटा सौर्य प्यानल राखिएको छ । यो आयोजनाको विद्युत ३ किलोमिटर दुरीको चन्द्रनिगाहपुर सबस्टेसनमा जोडिनेछ । आयोजनाले वार्षिक ६९.२५ लाख युनिट विद्युत उत्पादन हुनेछ ।
चन्द्रनिगाहपुरबाट उत्पादन सुरु भएपछि यहाँको सबै जनशक्तिलाई ढल्केबर र सिमरामा खटाइने न्यौपानेले बताए । जलविद्युतमा लगानी गरेर २ आयोजनाको सफल निर्माण गरेको कम्पनीले सौर्य विद्युत आयोजनामा पनि लगानी गरेको हो ।
कम्पनीले दार्चुलामा निर्माण गरेका साढे १६ मेगावाटका २ जलविद्युत आयोजना निर्माण पूरा भई राष्ट्रिय प्रसारण प्रणालीमा जोडिएका छन् । दार्चुलामै ४० मेगावाटको माथिल्लो चमेलिया आयोजना निर्माणाधीन छ ।
.jpg)