ऊर्जा खबर
काठमाडौं । नेपाल र बंगलादेशका ऊर्जा सचिवस्तरीय ५औं बैठक २०८० साल बैशाख २७ र २८ गते (मे १० र ११ तारिख) बंगलादेशको ढाकामा हुने भएको छ । अहिले यस विषयमा ऊर्जा, जलस्रोत तथा सिँचाइ मन्त्रालय तथा नेपाल विद्युत प्राधिकरणले तयारी गरिरहेका छन् ।
२७ गते दुवै देशका सहसचिव स्तरको बैठक हुने र सो बैठकले सिफारिस गरेका मुद्दाहरू २८ गते बस्ने सचिवस्तरीय बैठकले पारित गर्नेछ । अहिले मन्त्रालयमा नेपालतर्फको संयुक्त प्राविधिक समिति (जेटिटी) को छलफल भइरहेको छ ।
सचिवस्तरीय बैठकमा मुख्यतः ६८३ मेगावाटको सुनकोसी–३ जलाशय जलविद्युत आयोजना निर्माणका विषयमा छलफल हुने मन्त्रालयले जानकारी दिएको छ । यसअघिको बैठकमा प्राधिकरण र बंगलादेशको पावर डेभलपमेन्ट बोर्डले संयुक्तरूपमा निर्माण गर्ने निर्णय भएको थियो ।
मन्त्रालयका अनुसार यो आयोजना निर्माणको मोडालिटी र दुवै देशले गर्नुपर्ने साझेदारीका विषयमा छलफल केन्द्रित हुनेछ । यो सँगै आपसी अनुभव साटासाटा तालिम आदानप्रदान जस्ता विषयमा पनि छलफल हुने बताइएको छ ।
केही महिना अघि सम्पन्न नेपाल–भारत ऊर्जा सचिवस्तरीय बैठकले नेपालबाट ५० मेगावाट बिजुली बंगलादेश निर्यात गर्न स्वीकृति दिएको छ । यसका लागि आवश्यक पर्ने पूर्वाधारको विकास, भारतसँगको सहकार्यलाई पनि छलफलको प्राथमिकतामा राखिएको छ ।
काभ्रे, सिन्धुपाल्चोक र रामेछापलाई छुने सुनकोसी–३ जापान अन्तर्राष्ट्रिय सहयोग नियोग (जाइका) ले तयार गरेको कोसी बेसिन गुरुयोजनाबाट पहिचान भएको थियो । यो आयोजनाको सम्भाव्यता तथा विस्तृत आयोजना प्रतिवेदन (डिपिआर) तयार भइसकेको प्राधिकरणले जानकारी दिएको छ । साथै, वातावरणीय प्रभाव मूल्यांकन प्रतिवेदनसमेत स्वीकृत भइसकेको जनाइएको छ । वार्षिक २ अर्ब ३५ करोड युनिट विद्युत उत्पादन हुने सुनकोसी–३ को अधिकतम उचाई १६५ मिटर हुने अध्ययनले देखाएको छ ।
