ऊर्जा खबर
काठमाडौँ । डेडिकेटेड र ट्रंक लाइनको बक्यौता महसुल नतिरेको भन्दै लाइन काटिएका २३ वटा उद्योगमा नेपाल विद्युत् प्राधिकरणले लाइन जोडेर बिजुली सुचारु गराएको छ । प्राधिकरणले शुक्रबार राती १० बजेबाट १२ बजेसम्ममा काटिएका सबै उद्योगको लाइन जोडिदिएको जनाएको हो ।
यसअघि मंगलबार बसेको मन्त्रिपरिषद्को बैठकले काटिएका सबै उद्योगमा लाइन जोड्न निर्देशन दिएको भए पनि बिहीबार अपरान्ह ३ बजेमात्रै लिखित निर्देशन पाएको प्राधिकरणले जनाएको छ । लिखित निर्देशन पाएपछि शुक्रबार बिहान प्राधिकरण बोर्डको बैठक बसेर लाइन सुचारु गर्ने निर्णय गरेको थियो ।
शुक्रबारसाँझसम्म पनि लाइन नजोडिएपछि उद्योगी व्यवसायीले प्राधिकरणको उक्त कदमको आलोचना गर्न थालेका थिए ।
महसुल विवादको विषय छानबिन गरी टुंगोमा पुर्याउन सर्वोच्च अदालतका पूर्व न्यायाधीश गिरिशचन्द्र लालको अध्यक्षतामा न्यायिक छानविन आयोग गठन गरिएको छ ।
ट्रंक र डेडिकेटेड लाइनको सुविधा लिएर विद्युत उपयोग गरेका ६१ वटा उद्योगले २२ अर्ब २४ करोड रुपैयाँ महसुल तिर्न बाँकी रहेको प्राधिकरणले जनाएको छ। यसअघि प्राधिकरणले बक्यौता नतिरेको भन्दै २४ वटा उद्योगको लाइन काटिएकोमा एक उद्योगले किस्तामा महसुल तिर्न सुरु गरेपछि लाइन सुचारु गरिएको थियो ।
.jpg)
