रसुवागढीको अध्यक्ष र प्रबन्ध निर्देशकमा मिश्र र गैह्रे, ४ नयाँ सञ्चालक निर्वाचित 

काठमाडौँ । रसुवागढी हाइड्रो पावर कम्पनी लिमिटेडमा अध्यक्ष तथा प्रबन्ध निर्देशक तोकिनुका साथै एक जना महिलासहित ४ जना सञ्चालक निर्वाचित भएका छन् । असार ३० गते सम्पन्न निर्वाचनबाट ४ जना सञ्चालक निर्वाचित भएका हुन् । 

कम्पनीका अनुसार अध्यक्ष रहेका नेपाल विद्युत् प्राधिकरणका तत्कालीन उपकार्यकारी निर्देशक प्रदीपकुमार थिकेले अनिवार्य अवकाश पाएपछि चिलिमे जलविद्युत् कम्पनीका प्रमुख कार्यकारी अधिकृत सुभाषकुमार मिश्रलाई उक्त जिम्मेवारी तोकिएको छ । यस्तै, प्राधिकरणले मनोनित गर्ने दुई जना सञ्चालकमा राजन ढकाल र छवि गैह्रे रहेका छन् ।

ढकाल प्राधिकरण विद्युत् व्यापार विभागको निर्देशकको जिम्मेवारीमा छन् भने गैह्रे रसुवागढी कम्पनीको प्रमुख कार्यकारी अधिकृत थिए । ढकालको ठाउँमा यसअघि प्राधिकरणकै पूर्व–उपकार्यकारी निर्देशक प्रबल अधिकारी रहेका थिए । गैह्रेलाई कम्पनीको असार २७ गतेको सञ्चालक समितिको बैठकले प्रबन्ध निर्देशकको जिम्मेवारी तोकेको जनाइएको छ । 

यसैगरी, निर्वाचित सञ्चालकहरूमा बच्चुराम रिमाल, सुनौ औदी तामाङ, अग्रिमरत्न शाक्य र लक्ष्मी गौतम रहेका छन् । यसअघि कम्पनीको सञ्चालकमा भीमप्रसाद तिमल्सिना र रामप्रसाद रिमाल निर्वाचित भइसकेका थिए । २०७२ सालदेखि कम्पनीको सञ्चालकमा निर्वाचित हुँदै आएका रामप्रसाद रिमालको यो तेस्रो कार्यकाल हो । 

कम्पनीले निर्माण गरेको १ सय ११ मेगावाटको रसुवागढी जलविद्युत् आयोजना सञ्चालको अन्तिम तयारीमा छ ।