६ किलाेमिटर लामाे प्रसारण लाइन ८ महिनामा सम्पन्न गर्ने दोभान हाइड्रोको लक्ष्य

काठाडमौं । दोभान हाइड्रो पावर लिमिटेडले ३३ केभी सिंगल सर्किट प्रसारण लाइनको काम ८ महिनामा सम्पन्न गर्ने लक्ष्य राखेको छ । कम्पनीले कोशी प्रदेश अन्तर्गत सोलुखुम्बु जिल्लामा निर्माण गर्न लागेको ६ किलोमिटर लामो लाइनको काम ८ महिनामा सम्पन्न गर्ने लक्ष्य लिइएको हो ।

जिल्लाको सोलुदूधकुण्ड नगरपालिका–२ मा निर्माणाधीन जुनबेँसी खोला जलविद्युत आयोजनाको स्वीचयार्डदेखि सोलुदूधकुण्ड नगरपालिका–३ मा प्रवर्द्धक वेनी हाइड्रो पावर प्रोजेक्ट प्रालिबाट प्रवर्द्धित माथिल्लो सोलु खोला जलविद्युत आयोजनाको स्चिर्याडसम्म ६ किलोमिटर लामो सिंगल सर्किट प्रसारण लाइन निर्माण गर्न लागेको कम्पनीले जनाएको छ । कम्पनीले प्रसारण लाइन निर्माणका लागि विद्युत विकास विभागमा आवेदन दिएको छ । विभागबाट स्वीकृत प्राप्त हुने लगतै आयोजना निर्माणको काम अघि बढाउने पनि कम्पनीले जानकारी दिएको ।

विभागले लाइन निर्माण तथा सञ्चालन गर्दा पर्न सक्ने प्रतिकुल असरबारे सरोकारवासँग राय/सुझाव पेस माग गरेको छ । विभागले सरोकारवालाई ३५ दिनभित्रमा लिखित राय/सुझाव पेश गर्न आग्रह गरेको छ ।

यस लाइनबाट ५.२ मेगावाटसम्मको विद्युत प्रसारण गर्न सकिनेछ । ६ किलोमिटर लम्बाई भएको यस लाइनमा जम्मा १३० वटा पोलहरू खडा गरिनेछ । पोलको अधिकतम उचाई १३ मिटर तथा पोलहरूबीचको दूरी ४६.१५ मिटर हुने अध्ययनले देखाएको छ । आयोजनाको लागि करिब ४.६७२ हेक्टर जमिन आवश्यक पर्नेछ । प्रसारण लाइन निर्माण तथा सञ्चालन गर्दा भू–क्षय, बाढी, वायु प्रदूषण आदिद्वारा वातावरणमा प्रतिकुल असर नपर्ने गरी निर्माण गरिनेछ ।