रुख ढल्दा लहानमा तीन दिनदेखि विद्युत् सेवा अवरुद्ध

सिरहा । लहान नगरपालिका–२ मिलनचोकमा ३ दिनदेखि विद्युत् सेवा अवरुद्ध भएको छ । लहान–२ मिलनचोकको भवरा नहरको किनारमा रहेको वरको रुख ढल्दा विद्युत्‌काे तारमा क्षति पुगेको थियो । यसबाट  करिब २० घरपरिवारमा प्रभावित भएका छन् । 

गत शनिबार वर्षा भइरहेको समयमा रुख दिनेश यादव र श्यामलाल यादवको घरमा ढलेपछि उनीहरुको परिवार विचल्लीमा परेका छन् । रुख हटाएर विद्युत् सेवा सञ्चालन गर्न पहल भइरहेको लहान–२ का वडाध्यक्ष सियाराम यादवले बताए ।

‘वन कार्यालयसँग समन्वय गरी रुख हटाउने प्रयास गरिएको छ । सम्भवत आज (साेमबार) वन कार्यालयको प्राविधिक टोलीले रुख हटाउने छ । रुख हटाएपछि विद्युत् प्राधिकरण लहान वितरण केन्द्रमा सेवा सञ्चालनका लागि अनुरोध गर्छौँ’ उनले भने ।

डिभिजन वन कार्यालय लहानका सूचना अधिकारी राधेश्याम चौधरीले रुख हटाउने तयारी गरिएको जानकारी दिए । रुख हटाउन ढिला हुँदा पुनः ढल्ने सम्भावना भएकाले घरभित्र बस्न समस्या भएको पीडित श्यामलालले बताए ।