ऊर्जा खबर
काठमाडौं । रिडी हाइड्रो पावर कम्पनीले सोलार प्यानल मुनीको जग्गा कृषि जन्य उपज उत्पादनका लागि उपयोग गरेको छ । कम्पनीले साढे ८ मेगावाटको बुटवल सौर्य विद्युत आयोजनाको प्यानल मुनी तथा वरपरको जग्गामा बेसार, किम्ची साग, लसुन, प्याज खुर्सालीलगायत कृषि उपज लगाई जमिनको उपयोग गरेको हो ।
प्यानल मुनीको जग्गामा सबैभन्दा बढी बेसार खेती लगाइएको छ । सौर्य विद्युत आयोजनाबाट विद्युत उत्पादन बाहेक पनि यो वर्ष प्यानल मुनीबाट १२ टन बेसार उत्पादन हुन लागेको कम्पनीका कार्यकारी निर्देशक कुबेरमणि नेपालले बताए ।
‘बेसारलाई सेपिलो ठाउँ चाहिने रहेछ,’ उनले ऊर्जा खबरसँग भने, ‘यही कारण पनि प्यानल मुनीको जग्गामा बेसार खेती फस्टाएको छ । प्यानल पखाल्न प्रयोग हुने पानीले सिँचाइको काम गर्ने हुँदा राम्रो उत्पादन लिन सकिने रहेछ ।’उनले यो वर्ष १ हेक्टर क्षेत्रफलमा लगाइएको बेसार खेती अर्को वर्ष बढाउने योजना रहेको बताए ।
यो वर्ष उत्पादन हुने बेसार सबै बिउका लागि राखेर अर्को वर्ष १ सय टन उत्पादन गर्ने लक्ष्य छ ।यो वर्ष १ टन बेसार खनेर निकालिएको पनि नेपालले बताए ।
‘सौर्य विद्युत आयोजना निर्माण गर्दा खेती योग्य जमिन मास्न नहुने कुरा उठिरहेको छ । तर, खाली जमिनको सदुपयोग गर्न सक्दा कृषि उपज उत्पादन गर्न सकिने रहेछ’ उनले भने ।
आयोजना वरपरको खाली जग्गामासमेत किम्ची साग, लसुल, व्याज र खुर्साली लगाइएको छ । उत्पादन भएको किम्ची साग भाटभटेनी सुपरमार्केटले खरिद गर्दै आएको छ । कम्पनीले अहिलेसम्ममा प्रतिकिलो ७० रुपैयाँमा २ क्विन्टल किम्ची साग बिक्री गरेर आम्दानी गरेको छ ।
यो वर्ष परीक्षणका लागि मात्रै लगाइएकाले अर्को वर्षदेखि व्यावसायिक बेसार तथा तरकारी खेती गरेर राम्रो आम्दानी गर्ने योजना रहेको नेपालले बताए । प्यानल मुनीको घाँसको उपयोग गर्न सय वटा खसी बोका पाल्ने पनि कम्पनीले जनाएको छ ।
कम्पनीले निर्माण गरेको सौर्य विद्युत आयोजना निर्माण सम्पन्न भई राष्ट्रिय प्रसारण प्रणालीमा जोडिएको छ । कम्पनीले लगानी गरेका २.४ मेगावाटको रिडी खोला, ०.५ मेगावाटको रैराङ खोला र ९.९ मेगावाटको इवाखोला गरी ३ जलविद्युत केन्द्र सञ्चालनमा छन् ।
