ऊर्जा खबर
काठमाडाैं । आन्तरिक प्रसारण प्रणालीमा सुधार ल्याउन निर्माण गरिएको सिन्धुली-कपिलाकोट ३३/११ केभी (६/८एमभिए) को सबस्टेसन र एक्सटेन्सनको काम पूरा भएकाे छ । निर्माण सुरु भएकाे करिब दुई वर्षमा यसकाे काम सम्पन्न भएकाे हाे ।
यस आयाेजना अन्तर्गत सिन्धुलीमाडी-कपिलाकोटमा ३३/११ केभी प्रसारण लाइन पनि निर्माण गरिएको छ । स्थानीय समस्याका कारण प्रसारण लाइन सञ्चालनमा भने आउन सकेको छैन। २०७५ सालमा सुरु भएकाे अायाेजनाकाे निर्माण नेपाल विद्युत प्राधिकरण र कस्मिक रेनु जेभीले संग्युक्तरूपमा गरेका हुन् ।
कोरोना महामारीको प्रभावका कारण पनि निर्माणलाई तीव्रता दिई कम्पनीले काम सम्पन्न गरेकाे जनाएकाे छ । ३३/११केभी प्रसारण लाइनमा ओभरहेड लाइनसँगै भूमिगत लाइन पनि बिछ्याइएको छ।
सिन्धुलीमाडीदेखि कपिलाकोटसम्म तानिएको ३५ किलोमिटरको ओभरहेड लाइनमा ६०७ वटा पोल गाडिएका छन् भने भूमिगत लाइन ३.५ किलोमिटर विछ्याइएको छ । अहिलेसम्म सञ्चालनमा आइसक्नुपर्ने यो प्रसारण लाइन स्थानीय समस्याका कारण ढिलाई भइरहेकाे छ ।
कमलामाई नगरपालिका, खारखोला वडा नं. १, चाम्राइ वडा नं. १, खत्तर वडा नं. ४ र साङ्गेबलॆ वडाख नं. ४ मा जमिनको समस्याले १५ वटा पोलमा तार तान्न नसकिएकाे कम्पनीले जानकारी दिएकाे छ ।त्यसैगरी, मिलन चोकदेखि ढुम्रेबाससम्मको ६०० मिटर भूमिगत लाइन पनि जमिनको समस्याकै कारण बिछ्याउन नसकिएकाे कस्मिकका प्रबन्ध निर्देशक महेश महताेले बताए ।
प्रसारण लाइन र सबस्टेसनको निर्माणसँगै सिन्धुली, कपिलाकोट क्षेत्रका सर्वसाधारणले गुणस्तरीय विद्युत सेवा पाउने प्राधिकरणको दाबी छ । निर्माण पूरा भएपछि भाेल्टेजमा समेत सुधार हुने र चुहावट नियन्त्रण हुने अपेक्षा गरिएकाे छ ।
