ऊर्जा खबर
काठमाडौं । नेपाल विद्युत प्राधिकरणले १३२ केभी भक्तपुर–ठिमी प्रसारण लाइनको काम साढे एक वर्षमा सम्पन्न गर्ने भएको छ । बागमति अन्तर्गत भक्तपुर जिल्लाको दूधपाटीस्थित भक्तपुर सबस्टेसनको बसबारदेखि सोही जिल्लाको पूरानो ठिमीमा प्रस्तावित ठिमी सबस्टेसनसम्मको लाइन १८ महिनामा पूरा गर्ने भएको हो ।
२८० मेगावाट विद्युत प्रवाह क्षमता भएको ३.२७ किलोमिटर लामो भूमिगत लाइन २०८० साउनभित्र सम्पन्न गर्ने गरी अघि बढाएको प्राधिकरणले जनाएको छ । प्राधिकरणका अनुसार अध्ययन पूरा भएको आयोजनाको निर्माण अनुमति लिने प्रक्रिया अन्तिम चरणमा पुगेको छ ।
विद्युत विकास विभागले कम्पनीको नाममा निर्माण अनुमति जारी ३५ दिने सूचना जारी गरेको छ । प्रस्तावित प्रसारण लाइन निर्माण तथा सञ्चालन गर्दा प्रतिकुल असर पर्ने भएमा आगामी ३५ दिनभित्र विभागकाे कार्यालयमा आइपुग्ने गरी आफ्नो राय/सुझाव पठाउन स्थानीयसँग आग्रह गरेको छ ।
प्राधिकरणले यो लाइनसँगै भक्तपुर सबस्टेसनमा दुई वटा १३२ केभी लाइन बे एक्स्टेन्सन गरी स्तरोन्तति गर्ने कार्य र पूरा ठिमीमा नयाँ सबस्टेसन निर्माण गर्नेछ । लाइनमा ७ वटा ज्वाइन्ट्स पिट जडान हुनेछ ।
आयोजना निर्माणका लागि कूल ०.६५१७४ हेक्टन जमिन आवश्यक पर्नेछ जसमध्ये जडान खाडलका लागि ०.०१६८० हेक्टर जमिन स्थायी रुपमा र केवल ट्रेन्चका लागि ०.३८४९४ हेक्टर तथा भण्डारण तथा शिविरका लागि ०.२५ हेक्टर जग्गा अस्थायी रुपमा प्रयोग गरिनेछ ।
