ऊर्जा खबर
काठमाडौं । विद्युत् नियमन आयोगले दुई जलविद्युत् कम्पनीलाई हकप्रद सेयर निष्कासन गर्न पूर्वस्वीकृति दिएको छ । आयोगले राप्ती हाइड्रो एण्ड जनरल कन्स्ट्रक्सन र दोर्दी खोला जलविद्युत् कम्पनीलाई हकप्रद निष्कासनका लागि पूर्वस्वीकृति प्रदान गरेको हो ।
यी कम्पनीले आयोगमा १ः१ अनुपातमा हकप्रद निष्कासनको अनुमति माग गर्दै आवेदन दिएका थिए । सोही आधारमा अनुमति प्रदान गरेको छ ।
राप्ती हाइड्रो एण्ड जनरल कन्ट्रक्सनकाे चुक्ता पुँजी ६१ करोड २७ लाख रुपैयाँ छ । आयोगले यसको शतप्रतिशत हकप्रद सेयर निष्कासनका लागि पूर्वस्वीकृती दिएको हो । कम्पनीले ५ मेगावाटको रुकुम गाड जलविद्युत् आयोजना निर्माण गरी सञ्चालन गरिरहेको छ ।
यस्तै, दोर्दी खोलालाई पनि सोही अनुपातमा हकप्रद निष्कासन गर्न आयोगले स्वीकृति प्रदान गरेको छ । कम्पनीले १ अर्ब ५ करोड ४२ लाख ६० हजार रुपैयाँ बराबरको हकप्रद सेयर जारी गर्न कम्पनीले पूर्वस्वीकृति पाएको हो । कम्पनीले १२ मेगावाट क्षमताको दोर्दी–१ जलविद्युत् आयोजना सञ्चालन गरिरहेको छ ।
आयोगबाट स्वीकृति पाएका यी कम्पनीहरूले साधारण सभाबाट हकप्रद निष्कासन गर्ने प्रस्ताव अनुमोदन गर्नेछन् । धितोपत्र बोर्डबाट अन्तिम स्वीकृति प्राप्त गरिसकेपछि मात्र सेयरधनीका लागि सेयर निष्कासन गरी बाँडफाँड गर्नेछन् ।
.jpg)
