ऊर्जा खबर
काठमाडौं । बर्खाको बाढी र पहिरोले पहुँच सडक भत्काउँदा बझाङस्थित कालंगा बेसिनमा निर्माणाधीन ३८.४६ मेगावाटको माथिल्लो कालंगागाड जलविद्युत आयोजनामा जडान हुने उपकरण तथा निर्माण सामाग्री ढुवानीमा समस्या भएको छ । उपकरण तथा सामाग्री बोक्ने सवारी साधन गुड्ने पहुँच सडक बाढीले बगाएपछि ढुवानीमा समस्या उत्पन्न भएको हो ।
आयोजनास्थल पुग्ने सडक ठाउँ–ठाउँमा बाढीले बगाएको प्रवर्द्धक पुष्प चित्रकारले बताए । ‘बाढीले केही ठाउँको सडक बगाएको छ,’ उनले ऊर्जा खबरसँग भने, ‘कहीं कहीं पहिरो खसेर सडक बन्द भएको छ । यस्तो अवस्थामा सडक पूर्णरूपमा अवरुद्ध हुँदा ढुवानीका गाडी आयोजना स्थल पुर्याउन सकिएको छैन ।’
अहिले बगाएको तथा भत्किएको स्थानको सडक स्तरोन्नति गर्ने कार्य आयोजनाले गरिरहेको छ । बाढीले आयोजनाको बाँध र विद्युतगृहमा पनि सामान्य क्षति गरेको छ । बाँधमा पहिरो खसेर थुनिएपछिको बाढी बालुवा थिग्राउने पोखरीको एउटा प्यानल बगाएको चित्रकारले जानकारी दिए । विद्युतगृहमा पनि सामान्य क्षति पुगेको छ ।
निर्माण सामाग्री तथा उपकरण ढुवानी समस्या तथा बाढीले संरचनामा गरेको क्षतिका कारण आयोजनाको निर्माण प्रभावित हुँदा विद्युत उत्पादन तालिका पनि धकेलिने अवस्था देखिएको उनले बताए ।
आयोजनाको ८५ प्रतिशत बढी काम सम्पन्न भइसकेको छ । आयोजनाको ७ हजार ८ सय ५ मिटर लामो सुरुङ खन्ने काम सकिएको छ । सुरुङ ढलानको काम भइरहेको छ । आयोजनाको १ हजार १ सय ५० मिटर पेनस्टक पाइप राख्ने काम भइरहेको छ ।
विद्युतगृहको सिभिल संरचनाको काम पूरा भई उपकरण जडानको काम भइरहेको छ । इलेक्ट्रिोमेकानिकल उपकरण पुर्याउन नसँक्दा काम सुस्त भएको पनि चित्रकारले बताए ।
संरचना निर्माणको काम पूरा गरेर आयोजनाबाट २०७८ भदौ तेस्रो सातादेखि विद्युत उत्पादन गर्ने लक्ष्य छ । तर, कोरोना (कोभिड–१९) महामारी तथा बाढी पहिरोको समस्याका कारण यो तालिकामा विद्युत उत्पादन सुरु गर्न नसकिने देखिएको छ ।
पहिलो तालिका अनुसार आयोजनाबाट २०७७ असारदेखि उत्पादन सुरु गर्ने तालिका भए पनि भौगोलिक विकटता तथा कमजोर भौगोलिक अवस्थाका कारण सुरुङमा देखिएको समस्याले सम्भव नभएको कम्पनीले जनाएको छ ।
आयोजनाले उत्पादन गर्ने विद्युत दार्चुलास्थित १३२/३३ केभी बलाँच सबस्टेसनमा जोडिनेछ । आयोजना पूरा गर्न ६ अर्ब ९४ करोड रुपैयाँ लागत अनुमान गरिएको छ । आयोजनामा माछापुच्छ्रे बैंकको अगुवाइमा ८ बैंकले ऋण लगानी गरेका छन् ।
कालंगा बेसिनमा माथिल्लो कालंगागाडसहित १५.३३ मेगावाटको कालंगागाड र १०.७ मेगावाटको सानीगाड आयोजना निर्माणाधीन छन् । ३ वटै आयोजना एउटै समूहले निर्माण गरिरहेको हो ।
