अटेर सेवा प्रदायकलाई पोल भाडा तिर्न फेरि ताकेता, सम्झौता नगरी सेवा दिए सामाग्री जफत हुने

काठमाडौंं । नेपाल विद्युत प्राधिकरणले विद्युतीय संरचना प्रयोग गर्ने सेवा प्रदायक कम्पनीलाई शुल्क तिर्न पुनः  ताकेता गरेको छ । प्राधिकरणले आफ्नो प्रसारण तथा वितरण लाइनका संरचना प्रयोग गरी सेवा दिएर भाडा तिर्न अटेर गर्ने प्रदायक कम्पनीलाई बाँकी शुल्क तिर्न फेरि ताकेता गरेको हो ।

विद्युतीय संरचनाह प्रयोग गरी तथा अप्टिकल फाइवर भाडामा लिई टेलिफोन/इन्टरनेट/केवल टिभी सेवा सञ्चालन गर्ने सेवा प्रदायक संस्थालाई हालसम्मको बाँकी बक्यौता रकम भुक्तानी गर्न पुनःआह्वान गरिएको प्राधिकरण वितरण तथा ग्राहक सेवा निर्देशनालयले जनाएको छ ।

यस्तै, यी अधिकांश सेवा प्रदायक कम्पनीले नियमानुसार सम्झौता नगरी संरचना प्रयाेग गरिरहेकाे हुँदा  सम्झौता गर्न र नवीकरण गर्न पनि प्राधिकरणले सार्वजनिक गरेको सूचनामा उल्लेख छ । साथै, प्राधिकरणले नयाँ सम्झौता नहुँदासम्म सेवा विस्तारको कार्य नगर्न भनेकाे छ ।

नियमानुसार सम्झौता नगर्ने सेवा प्रदायकलले लाइन विस्तार गरेको पाइएमा लाइन विस्तारका सामाग्राी जफत गर्ने र विद्युतीय संरचनामा जडान भएका अप्टिकल फाइवर तथा अन्य उपकरणहरु हटाइने र यसको जिम्मेवारी सेवा प्रदायक संस्था आफै हुने चेतावनी प्राधिकरणले दिएकाे छ । 

हालका लागि लागु भएकाे भाडादर अनुसार अधिकांश सेवा प्रदायकले प्राधिकरणकाे पाेल भाडा तिरेका छैनन् । प्राधिकरणले केही स्थानमा तार काटेर असुल उपर गरेकाे भए पनि धेरैले राजनिति शक्तिकाे आडमा पोलबाट तिर्न अटेर गर्दै आएका छन् ।