ऊर्जा खबर
काठमाडौं । भिजन इनर्जी एण्ड पावर कम्पनी लिमिटेडले ५७.५ मेगावाट विद्युत जोडिने १३२ केभी डबल सर्किट प्रसारण लाइन निर्माण गर्ने भएको छ । कम्पनीले निर्माणाधीन जलविद्युत आयोजनाको विद्युत प्रवाह हुने २४ किलोमिटर लामो प्रसारण लाइन निर्माण गर्न लागेको हो ।
कम्पनीले रामेछाप जिल्लाको उमाकुण्ड गाउँपालिकाको वडा नम्बर १ देखि गोकुलगंगा गाउँपालिकाको वडा नम्बर १ मा रहेको नेपाल विद्युत प्राधिकरणको गर्जाङ सबस्टेसनसम्म प्रसारण लाइन निर्माण गर्नेछ ।
विद्युत विकास विभागले प्रसारण लाइन निर्माण गर्न कम्पनीको नाममा अनुमति दिने प्रकृया अन्तिम चरणमा पुर्याएको छ । विभागले विद्युत ऐन २०४९ को दफा ४ को व्यवस्था अनुसार विद्युत नियमावली २०५० को नियम १५ बमोजिम कम्पनीलाई अनुमतिपत्र दिन लागेको हो । कम्पनीलाई अनुमति पत्र दिन विभागले ३५ दिने सार्वजनिक सूचना जारी गरेको छ ।
विभागले अनुमतिपत्र दिनुअघि प्रसारण लाइन निर्माण तथा सञ्चालन गर्दा पर्न सक्ने प्रतिकुल असरबारे सम्बन्धित सरोकारवालासँग राय÷सुझाव मागेको छ । विभाग तथा कम्पनीको कार्यालयमा आइपुग्ने गरी सरोकारवालाबाट राय÷सुझाव मागिएको हो ।
लाइनमा ८४ वटा टावर रहनेछ । लाइनको काम सुरु भएको ३ वर्षमा पूरा हुने कम्पनीले जनाएको छ ।
