ऊर्जा खबर
काठमाडौं । रुरु जलविद्युत परियोजना कम्पनीकाे सेयर किन्न मागभन्दा ४ गुणा बढी आवेदन परेकाे छ । कम्पनीकाे गुल्मीमा सञ्चालित ५ मेगावाटको माथिल्लो हुग्दी जलविद्युत आयोजनाको सेयर किन्न प्रभावित क्षेत्रका स्थानीयबासीले उत्साहजनक सहभागिता जनाउँदै मागभन्दा बढी आवेदन दिएका हुन् ।
स्थानीयबासीका लागि ४ करोड ७ लाख ७० हजार ५ सय रुपैयाँ बराबरको ४ लाख ७ हजार ७ सय ५ कित्ता सेयर निष्कासन गरिएकाेमा बिहिबार साँझसम्मकाे तथ्याङ्क अनुसार १२ हजार आवेदकले १७ लाख ५० हजार कित्ताका लागि आवेदन दिएको कम्पनीले जनाएको छ । स्थानीयबासीले प्रतिकित्ता सय रुपैयाँका दरले न्युनतम १० कित्तादेखि अधिकतम ४ लाख कित्तासम्मका लागि आवेदन दिइरहेका छन् ।
स्थानीय बासीका लागि खुल्ला गरेको सेयर आवेदन अवधि आज (शुक्रबार) सकिन लागेकाले बाँकी स्थानीयकाे आवेदन साँझ ५ बजेसम्ममा आउने जानकारी कम्पनीले दिएकाे छ । आवेदन दिने अवधि सकिएपछि अबकाे एक साताभित्र निष्कासन गरेकाे सेयर स्थानीयबासीमा बाँडफाँड गरिने कम्पनीले जनाएकाे छ ।
कम्पनीले गत फागुन ७ गते देखि स्थानीय बासीका लागि सेयर बिक्री खुल्ला गरेको थियाे । स्थानीयबासीले साइन रेसुङ्गा डेभलपमेन्ट बैंक, गरिमा विकास बैंक, ग्लोबल आइएमई बैंकको गुल्मी शाखा कार्यालयबाट सेयर आवेदन दिन सक्नेछन् । साथै, सी–आस्बा सदस्यता प्राप्त गरेका सम्पूर्ण बैंक तथा वित्तिय संस्थाबाट पनि आवेदन दिने व्यवस्था मिलाइकाे छ ।
स्थानीयको सेयर निष्कासन गरी बाँडफाँडको प्रक्रिया पूरा भएपछि सर्वसाधारणका लागि छुट्याएको सेयर चैत दोस्रो साताबाट निष्कासन गर्ने तयारी भइरहेको पनि कम्पनीले जनाएको छ । सर्वसाधारणका लागि ४ लाख ७ हजार ७ सय ६ कित्ता सेयर छुट्याइएको छ ।
स्थानीयबासीका लागि प्रतिकित्ता सय रुपैयाँ मूल्य निर्धारण गरिए पनि सर्वसाधारणका लागि प्रतिकित्ता १ सय २० रुपैयाँ मूल्य तोकिएको छ । सर्वसाधारणका लागि ४ करोड ८९ लाख २४ हजार ७ सय २० रुपैयाँ बराबरको सेयर छुट्याइएको छ ।
सेयर निष्कासन गरी बाँडफाँड गर्न एनएमबी क्यापिटल लिमिटेडले गर्दैछ ।माथिल्लो हुग्दीमा लगानी गर्ने समूहले नै ८६ मेगावाटको सोलु दूधकोसी जलविद्युत आयोजना निर्माण गरिरहेको छ ।
.jpg)
