माई खोलाको सेयर बाँडफाँड, ९६ हजार जनाको आवेदन रद्द

काठमाडौं । माई खोला हाइड्रो पावर लिमिटेडले सेयर बाँडफाँड भएको छ । कम्पनीले बैशाख ८ गतेदेखि १२ गतेसम्म सर्वसाधारणका लागि बिक्री गरेको सेयर आज (मंगलबार) बाँडफाँड भएको हो ।

कम्पनीको सेयर १ लाख २६ हजार ९ सय ४१ जनाले १०/१० कित्ताका दरले पाएको बिक्री प्रबन्धक प्रभु क्यापिटलले जनाएको छ । कम्पनीको सेयरका लागि १३ लाख ६३ हजार २ सय ६६ जनाले १ अर्ब ५१ करोड ६५ लाख ८३ हजार रुपैयाँ बराबरको १ करोड ५१ लाख ६५ हजार ८३० कित्ता सेयरको लागि आवेदन दिएका थिए । त्यसमध्ये ९५ हजार ९८१ जनाको आवेदन रद्ध भएका जनाइएको छ ।

कम्पनीको सेयरका लागि १२ लाख ७३ हजार ८९१ जनाको योग्य आवेदन परेको बिक्री प्रबन्धकले जनाएको छ । कम्पनीको सेयरका लागि माग भन्दा बढी आवेदन परेकोले धितोपत्र निष्काशन तथा बाँडफाँट निर्देशिका अनुसार गोलाप्रथा माध्यमबाट न्युनतम १० कित्ताका दरले वितरण भएको छ ।

योग्य आवेदकमध्येबाट १ लाख २६ हजार ९ सय ४१ जनाले १०/१० कित्ता र त्यसमध्येबाट एक जना भाग्यमानीले थप एक कित्ता गरी ११ कित्ता सेयर पाएको प्रभु क्यापिटलले जनाएको छ । कम्पनीको इलाममा ३ मेगावाटको सुपरमाई क्यासकेड जलविद्युत आयोजना सञ्चालनमा छ ।