ऊर्जा खबर
काठमाडौं । नेपाल विद्युत प्राधिकरणका पूर्वकार्यकारी निर्देशक हितेन्द्रदेव शाक्यले दिगो तथा भरपर्दो विद्युत आपूर्तिका पम्प स्टोरेज जलविद्युत आयोजना एकमात्र विकल्प रहेको बताएका छन् । केही साता अघि आयोजित ‘विद्युत खपत र बजारः सम्भावना र चुनौतीहरू’ विषयक कार्यक्रममा कार्यपत्र प्रस्तुत गर्दै उनले यस्तो बताएका हुन् ।
नदी प्रवाही (आरओआर) आयोजनाले मौसमी उत्पादन गर्ने हुँदा हिउँदको आपूर्ति, भरपर्दो उपलब्धता जस्ता समस्या समाधानका लागि पम्प स्टोरेज आयोजनाको विकल्प नरहेको पनि उनले दोहोर्याए । नेपालले भारतमा बिजुली बेच्ने विषयमा जोड दिइरहँदा आन्तरिक खपतमा पनि उतिकै ध्यान दिनुपर्ने उनको भनाइ थियो ।
‘जुन बिजुली हामी भारतमा बेच्न खोजिरहेका छौं, त्यो सहुलियतको हो; प्रतिस्पर्धी बजारले मागेको होइन,’ उनले भने, ‘बजारले मागे अनुसार निर्यात गर्न हामीले त्यही अनुसार योजना बनाउनुपर्छ, काम गर्नुपर्छ ।’ अहिले बर्खामा बिजुली खेर गइरहेको, चाहेजति भारतमा बेच्न सकिएको र भरपर्दो विद्युत आपूर्ति नहुँदा गार्हस्थ र औद्योगिक क्षेत्रले विद्युत कटौतीको समस्या भोगिरहेको अवस्था अन्त्य गर्न पनि पम्प स्टोरेजको विकल्प नरहेको उनको भनाइ थियो ।
सन्तुलित विद्युत विकासको एकमात्र आधार पम्प स्टोरेज जलविद्युत आयोजना नै हो । पहाडको खोंच हुँदै बग्ने नदी तथा खोलाहरूमा पम्प स्टोरेज आयोजना बनाउन सकिन्छ । रूपाताल र बेगनासमा अध्ययन पनि भइरहेको तथा कुलेखानी जलाशयमा पम्प स्टोरेज बनाउन सकिने भन्दै शाक्यले अन्य सम्भावित क्षेत्रको पनि अध्ययन गर्दै जानुपर्ने तर्क प्रस्तुत गरेका थिए ।
गत भदाै ७ गते आयाेजित अन्तरक्रिया कार्यक्रममा प्रस्तुत गरिएकाे कार्यपत्रकाे भिडियाे
