ऊर्जा खबर
काठमाडौं । रसुवा जिल्लामा २२.१ मेगावाटको जलविद्युत आयोजना निर्माण गरी सञ्चालन गरिरहेको चिलिमे हाइड्रो पावर कम्पनी लिमिटेडले जलविद्युत केन्द्रको विद्युत बिक्री गरी ८० करोड भन्दा बढी आम्दानी गरेको छ । कम्पनीले सार्वजनिक गरेको वित्तीय विवरण अनुसार आर्थिक वर्ष (आव) २०७९/८० को तेस्रो त्रैमासमा विद्युत बिक्रीबाट सो आम्दानी गरेको हो ।
कम्पनीले आवको साउनदेखि चैतसम्ममा जलविद्युत केन्द्रको विद्युत बिक्री गरी ८० करोड ४२ लाख ४६ हजार रुपैयाँ आम्दानी गरेको कम्पनीले जनाएको छ । कम्पनीका अनुसार गत वर्षको तुलनामा विद्युत बिक्रीबाट भएको आम्दानी घटेको हो । गत वर्ष यही समयअवधिमा ८२ करोड ३४ लाख ३५ हजार रुपैयाँ आम्दानी गरेको थियो ।
कम्पनीको आम्दानी घटेपनि खुद नाफा भने बढेको देखिएको छ । कम्पनीले यो अवधिमा ५२ करोड ८९ लाख ८३ हजार खुद नाफा कामाएको सार्वजनिक वित्तीय विवरणमा उल्लेख छ । गत वर्ष यही समयअवधिमा ५२ करोड २० लाख रुपैयाँ मात्र नाफा कमाएको थियो ।
