ऊर्जा खबर
काठमाडौं । नेपाल र भारतकाे उत्तर प्रदेश जोड्ने १३२ केभी मैनहिया–सम्पत्तिया सीमापार प्रसारण लाइन सञ्चालनमा आएकाे छ । आयातित विद्युत्लाई भरपर्दो र गुणस्तरीय पूर्वाधारमार्फत भित्र्याउने उद्देश्यले निर्माण गरिएको लाइनको काम सम्पन्न भएको हो ।
रुपन्देहीको सियारी गाउँपालिका नजिकै मैनहिया सबस्टेसनदेखि भारत उत्तर प्रदेश राज्यको सम्पत्तिया न्यू नौतनवा सबस्टेसनसम्म जोड्ने लाइनको निर्माण पूरा गरी चार्ज गरिएको आयोजना प्रमुख हरिप्रसाद पाण्डेले बताए ।
२८.५ किलोमिटर लामो आयोजनामा ९५ वटा टावर निर्माण गरिएको छ । ‘यो आयोजनाअन्तर्गत नेपालतर्फ २८ किलोमिटर लाइन निर्माण गरिएको छ, भने बाँकी ५०० मिटर भारततर्फ पर्छ,’ उनले ऊर्जा खबरसँग भने, ‘नेपालतर्फको लाइन ६ महिनाअघि नै चार्ज गरिएको थियो, भारतसँग जोडेर ५ दिनअघि (पुस १७ गते) मात्रै चार्ज भयो ।’
प्रसारण लाइनको उद्घाटन भोलि (पुस १९ गते) नेपाल र भारतका परराष्ट्रमन्त्री स्तरीय टाेलीले गर्ने भएकाे छ । उद्घाटन कार्यक्रमामा नेपालका तर्फबाट परराष्ट्र मन्त्री नारायणप्रसाद साउदकाे टाेली सहभागी हुने पाण्डेले बताए ।
यो प्रसारण लाइनबाट २०० मेगावाट विद्युत् प्रवाह हुनेछ । अहिले उत्तर प्रदेशसँग ३३ केभीको मात्र प्रसारण संरचना रहेकोले अन्तरदेशीय विद्युत् व्यापारलाई अझ सहज बनाउन १३२ केभी लाइन निर्माण गरिएको हो ।
करिब ८० लाख अमेरिकी डलर अनुमानित लागत रहेको आयोजनामा नेपाल सरकारको लगानी छ । मैनहिया सबस्टेसनबाट सुरु हुने प्रसारण लाइन भारतसँगको सीमा बिन्दु मर्चवार (श्रीरामपुर) सम्म निर्माण भएको छ ।
नेपाल र भारतबीचका ऊर्जा सचिवस्तरीय संयुक्त निर्देशक समितिको २०७५ माघमा पोखरामा सम्पन्न छैटौँ बैठकले भारतको उत्तर प्रदेश र नेपालबीच न्यू नौतनवा–मैनहिया लाइन निर्माण गर्ने सहमति गरेको थियो ।
यसपछि २०७६ कात्तिकमा भारतको बैङ्लोरमा सम्पन्न ऊर्जा सचिवस्तरीय संयुक्त निर्देशक समितिको सातौँ बैठकले प्रसारण लाइनलाई न्यू–नौतनवा (सम्पत्तिया, भारत) सबस्टेसनमा जोड्ने निर्णय गरेको थियो ।
