तनहुँ र दूधकाेशी आयोजना निर्माणमा सहजीकरण गरिदिन एडीबीका उपमहानिर्देशकद्वारा मन्त्रालयलाई आग्रह

काठमाडौँ । एसियाली विकास बैंक (एडीबी) दक्षिण एसियाली विभागका उपमहानिर्देशक सिन्डी माल्भिसिनीले निर्माणाधीन १४० मेगावाटकाे तनहुँ र ६०० मेगावाटकाे दूधकाेसी जलाशय जलविद्युत् आयाेजना निर्माणमा सहजीकरण गरिदिन ऊर्जा, जलस्रोत तथा सिँचाइ मन्त्रालयसँग अनुराेध गरेकी छन् । ऊर्जा मन्त्रालयमा असोज १५ गते ऊर्जा, जलस्राेत तथा सिँचाइ मन्त्री दीपक खड्कासँगको भेटका क्रममा उनले यस्तो अनुराेध गरेकी हुन् ।

साेही क्रममा मन्त्री खड्काले एडीबीको लगानीमा निर्माण भएका आयोजनालाई यथाशीघ्र सम्पन्न गर्न सरकार लागिपरेको उल्लेख गर्दै निर्माणका क्रममा देखिएका चुनौतीलाई सरकारले चाँडो सम्बोधन गर्ने बताए । आयोजना निर्माणका क्रममा गर्नुपर्ने अन्तरमन्त्रालय समन्वय गर्न समेत सरकारले ध्यान दिएको उनले आश्वस्त पारे ।

मुलुकका दुई ठूला राजनीतिक दल मिलेर दरिलो सरकार गठन भएकाले ढुक्क भएर नेपालमा लगानी गर्न पनि खड्काले एडीबीलाई आग्रह गरे । उहाँले नेपाल मध्यम आय भएको देशमा रूपान्तरण हुने बाटोमा अगाडि बढेकाले यमसा एडीबीको साथ र सहयोग आवश्यक रहेको उल्लेख गरेका थिए ।

त्यसै क्रममा उपमहानिर्देशक माल्भिसिनीले तनहुँको निर्माण समयमै पूरा गर्न तथा दूधकोशीलाई निर्माणमा लैजान देखिएका समस्या समाधानका लागि सहजीकरण गरिदिनुपर्नेमा जोड दिएकी थिइन् । उनले नेपालमा विकास निर्माणको वातावरण सुनिश्चित गरे एडीबीले धेरै क्षेत्रमा सहयोग गर्ने बचन दिएकी थिइन् ।

उक्त भेटमा ऊर्जा, जलस्रोत तथा सिँचाइ मन्त्रालयकी सचिव सरिता दवाडी, एडीबी नेपालका आवासीय निर्देशक अर्नो कुस्वा लगायतको सहभागिता थियो ।