१४ किलाेमिटर लामाे १३२ केभी प्रसारण लाइन डेढ एक वर्षमा सम्पन्न गर्ने हिम रिभरकाे लक्ष्य

काठमाडौं । हिम रिभर पावर लिमिटेडले १४ किलोमिटर लामाे सिंगल सर्किट प्रसारण लाइनको काम करिब साढे एक वर्षमा सम्पन्न गर्ने भएको छ । बागमती प्रदेश अन्तर्गत सिन्धुपाल्चोक जिल्लाको भोटेकोसी गाउँपालिकामा निर्माणाधीन लिपिङ खोला जलविद्युत आयोजनाको स्विच्यार्डदेखि सोही गाउँपालिकामा रहेको माथिल्लो चाकु–ए आयोजनाको स्वीच्यार्डसम्मको १३२ केभी प्रसारण लाइनकाे काम १६ महिनामा सम्पन्न गर्ने लक्ष्य राखेको हो । 

कम्पनीले आयोजना निर्माण गर्न विद्युत विकास विभागमा आवेदन दिएको छ । विभागबाट स्वीकृत प्राप्त भए लगतै आयोजना निर्माण गरिनेछ । 

विभागले आयोजना निर्माण तथा सञ्चालन गर्दा पर्न सक्ने प्रतिकुल असरबारे ३५ दिनभित्र लिखित राय/सुझाव पेश गर्न आग्रह गरेको छ । 

१४ किलोमिटर लामो लाइनमा ३७ वटा टावरहरु खडा गरिनेछ । टावरको उचाई अधिकतम ३६ मिटरसम्म रहने तथा टावारहरुबीको दुरी ८० मिटर देखि ८५४ मिटरसम्म हुनेछ । 

आयोजना निर्माणका लागि कुल २४.६५ हेक्टर जमिन आवश्यक पर्ने अध्ययनले देखाएको छ । जसमध्ये, ०.५३३ हेक्टर ३७ वटा टावरको लागि र २४.११७ हेक्टर आयोजनाको लागि आवश्यक पर्नेछ । 

आयोजना निर्माण तथा सञ्चालन गर्दा भू–क्षय, बाढी, बायु प्रदुषण आदिद्वारा वातावरणमा उल्लेखनीय असर नपर्ने गरी निर्माण गरिनेछ ।