ऊर्जा खबर
काठमाडौं । नेपाल विद्युत प्राधिकरण अमुवा वितरण केन्द्रले ६३ लाख ३८ हजार विद्युत महसुल बक्यौता असुली गरेको छ । केन्द्रले लामो समयसम्म विद्युत महशुल नबुझाउने ग्राहकको लाइन काटी बक्यौता असुली गरेको हो ।
बारम्बार ताकेतागर्दा पनि महसुल बुझाउन अटेर गर्ने ग्राहकको लाइन काटि बक्यौता असुली गरेको केन्द्र प्रमुख महेन्द्र दासले बताए । उनका अनुसार चालु आर्थिक वर्ष २०७८/७९ सुरु भएदेखि हालसम्मको अवधिमा महसुल बुझाउन अटेर गर्ने ८ सय १३ ग्राहकको लाइन काटी बक्यौता असुल गरिएको छ ।
लाइन काटिएका ग्राहकबाट करिब ५८ लाख ३९ हजार ५ सय रुपैयाँ असुली गर्न बाँकी थियो । लाइन काटिएका ग्राहकमध्ये ६ सय ३० जनाले जरिवाना सहितको ६३ लाख ३८ हजार ६ सय ५५ रुपैयाँ बुझाएपछि उनीहरुको लाइन पुन जोडिएको छ ।
बाँकी १ सय ८० जनाले पनि जरिवाना सहितको बाँकी बक्यौता बुझाएपछि उनीहरुको लाइन पुन जोडिने पनि दासले बताए ।
केन्द्रले विद्युत महसुल संकलनलाई तिव्र गतिमा अघि बढाएको छ । पहिलो चरणमा ३ हजारभन्दा बढी भएको वा ६० दिनसम्म विद्युत महसुल नबुझाउने ग्राहकको लाइन काटिएको दासले बताए ।
