ऊर्जा खबर
बैतडी । बैतडीको सिगास गाउँपालिका –३ स्थित लगन बजारमा पहिलो पटक बिजुलीबत्ती बलेको छ । लगन बजारमा ट्रान्सफर्मर राखेसंगै बिजुलीबत्ती बलेको हो ।
सिगास गाउँपालिका र नेपाल विद्युत प्राधिकरण बैतडी वितरण केन्द्रको संयुक्त प्रयासमा सिगास गाउँपालिकाका विभिन्न स्थानमा विद्युत विस्तारको कार्य भइरहेको सिगास गाउँपालिका –३ वडाअध्यक्ष अमर सिंह धामीले बताए । ठुलीसैनी लगन, चामडाया, पैरा मल्लीसैनी लगायतका टोलहरुका लागि मिटर बक्स मगाइसकेकाले एक हप्ता भित्रै बिजुली बल्ने उनले बताएका छन् ।
लामो समयको पर्खाइपछि गाउँघरमा विद्युत विस्तार भएपछि खुसी लागेको स्थानीयहरुले बताएका छन् । लगन बजारमा विद्युत विस्तार भएसंगै आसपासका क्षेत्रहरुमा पनि विद्युत विस्तार गरिने भएको छ ।
बाँकी रहेका टोलका लागि पनि वडा नम्बर ३ कै चमडेखर्कमा र्को ट्रान्सफर्मर जडानको काम भैसकेको र चार्ज हुन बाँकी रहेकाले सो क्षेत्रमा समेत छिट्टै बिजुली बल्ने वडाअध्यक्ष धामीले जानकारी दिए ।
सिगास गाउँपालिकामा विद्युत विस्तारका लागि तीव्र रुपमा काम भइरहेको बताइएको छ ।
