ऊर्जा खबर
काठमाडौँ । ऊर्जा, जलस्रोत तथा सिँचाइ मन्त्रालय नीति महाशाखाका प्रमुख नवीनराज सिंहलाई विद्युत् विकास विभागको महानिर्देशक नियुक्त गरिएको छ । साउन १७ गतेको मन्त्रीस्तरीय निर्णयबाट उनलाई उक्त जिम्मेवारी तोकिएको हो । यसअघि पनि उनले दुई पटक विभागको नेतृत्व गरिसकेका छन् ।
सोही मन्त्रीस्तरीय निर्णयअनुसार सिंहलाई विभागको जिम्मेवारी तोकिएपछि निर्वतमान महानिर्देशक जिबछ मण्डललाई जल तथा ऊर्जा आयोगको सचिवालयमा सरुवा गरिएको छ । मण्डल २०८० माघ २२ गते विभागको महानिर्देशक नियुक्त भएका थिए । करिब ६ महिना उनी उक्त जिम्मेवारीमा रहे ।
१७ गतेकै मन्त्रीस्तरीय निर्णयले जल तथा ऊर्जा आयोगका सहसचिव चिरञ्जीवी चटौतलाई नीति महाशाखामा सरुवा गरिएको मन्त्रालय स्रोतले जानकारी दिएको छ । मण्डलअघि विभागको महानिर्देशकको जिम्मेवारी चटौतले सम्हालेका थिए ।
सिंहले पहिलो पटक २०७३ असोज १७ गतेदेखि २०७५ पुस १६ गतेसम्म विभागको महानिर्देशकको जिम्मेवारी सम्हालेका थिए । त्यसपछि जल तथा ऊर्जा आयोगमा सरुवा भएका उनी करिब २ वर्ष कोशी प्रदेशका सचिवको भूमिकामा रहेका थिए । पछिल्लो समय उनलाई मन्त्रालयको अति महत्त्वपूर्ण मानिने नीति महाशाखाको जिम्मेवारी तोकिएको थियो ।
त्यस्तै, २०४१ सालमा कञ्चनपुरको महेन्द्रनगरस्थित बैजनाथ माध्यमिक विद्यालयबाट एसएलसी उत्तीर्ण गरेका चटौत २०५२ सालमा इन्जिनियरबाट सरकारी सेवा प्रवेश गरेका थिए । उनले महेन्द्रनगरकै सिद्धनाथ साइन्स क्याम्पसबाट आइएस्सी उत्तीर्ण गरी भारतबाट इलेक्ट्रिक इन्जिनियरिङमा स्नातक र जलस्रोत विकासमा रुड्की विश्वविद्यालयबाट स्नातकोत्तर गरेका हुन् ।
शुरूमा भूमिगत सिँचाइका क्षेत्रमा काम गरेका उनी २०६१ सालमा विभागमा प्रवेश गरी ( वर्षसम्म विभिन्न पद हुँदै उपमहानिर्देशकसम्मको जिम्मेवारी सम्हालेका थिए । उनले विभागमै रहँदा ३ वर्ष पञ्चेश्वर विकास प्राधिकरणको कार्यकारी सञ्चालकको जिम्मेवारी समेत सम्हालेका थिए ।
यसैगरी, २०५३ साल मंसिरमा विभागको इन्जिनियरबाट सरकारी सेवा प्रवेश गरेका मण्डल २०७१ साल माघमा सहसचिवमा बढुवा भएका थिए । विभागको जिम्मेवारीमा प्रवेश गर्नुपूर्व मण्डलले १ वर्ष जनकपुर चुरोट कारखानामा इलेक्ट्रिकल सेक्सन इन्चार्ज र पश्चिमाञ्चल क्षेत्रीय क्याम्पस पोखरामा इलेक्ट्रिकल इन्जिनियरिङ विभाग अन्तर्गत उप–प्राध्यापक भएर जिम्मेवारी पूरा गरेका थिए ।
मण्डलले कोलम्बो प्लान अन्तर्गत अलिगड मुस्लिम विश्वविद्यालयबाट इलेक्ट्रिकल इन्जिनियरिङमा स्नातक र रुड्की विश्वविद्यालयबाट जलविद्युत् तथा व्यवस्थापनमा स्नातकोत्तर तहसम्मको अध्ययन पूरा गरेका छन् ।
