७ दिनभित्र माग सम्बोधन नभए गाेटा गन्ती मिटर रिडरले आन्दोलन गर्ने

काठमाडौं । नेपाल विद्युत प्राधिकरणमा कार्यरत मिटर रिडर संघर्ष समितिले गोटा गन्ति मिटर रिडरलाई प्राधिकरणको ज्यालादारी कर्मचारी बनाउन माग गरेको छ । मिटर रिडरलाई गोटा ठेक्काका मान्छे हुन भन्दै अपमानपूर्ण व्यवहार भएको भन्दै जेठ २३ गते केन्द्रीय कार्यालयलाई ध्यााकर्षण पत्र बुझाउँदै समितिले यस्ताे माग गरेको हो ।

मिटर रिडरहरूलाई प्राधिकरणको ज्यालादारी सरह ६२३ जनालाई एकै प्रकारको ज्यालादारी कर्मचारी बनाउन माग गरिएको समितिले जनाएको छ । समितिले लामो समयदेखि प्राधिकरणले मिटर रिडरमाथि विभेद गर्दै सेवा सुविधाबाट बञ्चित गरेको आरोप लगाउँदै आगामी ७ दिनभित्र माग सम्बोधन नभए आन्दोलन सुरु गर्ने चेतावनी दिएको छ ।

पटकपटक आफ्ना मागबारे ध्यानाकर्षण गर्दा पनि सम्बन्धित निकायले समाधानका लागि चासो नदेखाएकाले ७ दिनभित्र माग सम्बोधन गर्न अल्टिमेटम दिइएको छ । माग पूरा नभए आगामी असार १ गतेबाट चरणबद्धरूपमा आन्दोलनका कार्यक्रम अघि बढाइने उनीहरूको चेतावनी छ ।

लामो समयदेखि कार्यरत रहेर प्राधिकरणको हरेक कामकाजमा उत्साहपूर्ण र सक्रियरूपमा सहभागी भए पनि मिटर रिडरलाई वेवास्ता गर्दै आएको समितिको आरोप छ । विगत १५ वर्षदेखि प्राधिकरणमा कार्य गर्दै आए पनि प्राविधिकरूपमा पाउनुपर्ने सेवा सुविधाबाट बञ्चित गरेको समितिको ध्यानाकर्षण पत्रमा उल्लेख छ । पत्रमा प्राधिकरणमा गरेको योगदान र श्रमको खिल्ली उडाइएको, कुनै मुल्याङ्कन समेत नभएको समेत उल्लेख छ ।