ऊर्जा खबर
काठमाडौं । पछिल्लो वर्षमा निस्क्रिय रहेको पश्चेश्वर बहउद्देश्यीय परियोजनाको विस्तृत आयोजना प्रतिवेदन (डिपिआर) आगामी तीन महिनाभित्र टुंग्याउने सहमति भएको छ । भारत भ्रमणका रहेका प्रधानमन्त्री पुष्पकमल दाहालले महाकाली सन्धिअनुसार आयोजनाको डिपिआर बनाउने विषयमा दुई देशबीच सहमति भएको जानकारी दिएका हुन् ।
जेठ १७ गते (बुधबार) देखि भारत भ्रमणमा रहेका दाहालले नेपालको ऊर्जा व्यापारमा ‘ब्रेक थ्रु’ भएको बताए । नेपालको विद्युत व्यापार, पारवहन, पेट्रोलिमय पाइपलाइन विस्तार, आर्थिक पूर्वाधार निर्माणका लागि दुई देशबीच विभिन्न समझदारी भएको उल्लेख गर्दै प्रधानमन्त्री दाहालले जलविद्युत क्षेत्रमा महत्वपूर्ण उपलब्धि हासिल भएको बताएका हुन् । ‘जलविद्युत् क्षेत्रमा लगानीका लागि महत्वपूर्ण आधार तयार भएको छ’, उनले भने, ‘नेपालको विद्युत बंगलादेशसम्म निर्यात गर्नका लागि महत्वपूर्ण सहमति भयो ।’
सीमा क्षेत्रमा देखिएका समस्या समाधान गर्न भारतले पहिलोपटक प्रतिबद्धता जनाएको पनि दाहालले बताए । प्रधानमन्त्री दाहालको भारत भ्रमणका क्रममा दुई देशबीच ऊर्जा तथा जलविद्युत् विकास र व्यापार, पारवहन सम्झौताको पुनरावलोकन र नवीकरण, अन्तरदेशीय प्रसारणलाइन निर्माण, पेट्रोलियम पाइपलाइन निर्माण र विस्तार, एकीकृत जाँच चौकी निर्माण, महाकाली नदीमा पक्की पुल निर्माण, अन्तरदेशीय भुक्तानीसम्बन्धी सम्झौतामा हस्ताक्षर भएको छ ।
प्रधानमन्त्री दाहाल भारतीय प्रधानमन्त्री मोदीको निमन्त्रणामा यही जेठ १७ गतेदेखि भारतको औपचारिक भ्रमणमा छन् ।
