ऊर्जा खबर
काठमाडौं । चिलिमे जलविद्युत कम्पनी लिमिटेडले गण्डकी प्रदेशको गोरखा जिल्लामा ४५ मेगावाटको चुमचेत स्यारखोला जलविद्युत आयोजना निर्माण गर्ने भएको छ । कम्पनीले चुमनब्री गाउँपालिका पहिचान भएको आयोजना अघि बढाएको हो ।
कम्पनीले अघि बढाएको आयोजनाको वातावरणीय प्रभाव मूल्यांकन अध्ययन प्रतिवेदन तयारीको क्रममा आयोजना प्रभावित स्थानीयसँग राय/सुझाव माग गरिएको छ । सम्बन्धित सरोकारवालालाई आयोजना निर्माण गर्दा स्थानीय क्षेत्रको वातावरणमा पर्न सक्ने प्रतिकुल प्रभावका सम्बन्धमा लिखित राय/सुझाव माग गरिएको छ ।
प्रतिवेदन तयारी गर्ने क्रममा सो क्षेत्रको प्राकृतिक, भौतिक, जैविक, सामाजिक, साँस्कृतिक र आर्थिक प्रणालीमा के कस्तो प्रभाव पर्दछ भनी यकिन गर्न सो क्षेत्रको नगरपालिका, गाउँपालिका, विद्यालय, अस्पताल, स्वास्थ्य चौकी तथा सरोकारवाला त्यक्ति वा संस्थासँग लिखित राय/सुझाव माग गरिएको छ ।
सम्बन्धित व्यक्तिले कम्पनीको कार्यालय वा परामर्शदाता कम्पनी चिलिमे इन्जिनियरीङ एण्ड सर्भिसेज कम्पनी लिमिटेडको कार्यालयमा आगामी ७ दिनभित्र आइपुग्ने गरी आफ्नो सुझाव पठाउनुपर्नेछ ।
प्रस्तावित आयोजनाको वेयर र विद्युतगृह नदीको जलाधार क्षेत्रमा क्रम ५७०.१७ र ६४०.२८ वर्ग किलोमिटर रहेको छ । आयोजनाले चुमनुब्री गाउँपालिका वडा नम्बर ६ चुमलिङ नजिक ९ मिटर अग्लो र १५.५० मिटर लम्बाइको वेयर निर्माण गरी १३.५० घनमिटर प्रतिसेकेण्ड पानीको बहावलाई भुमिगत ग्रेभलट्रेप हुँदै भुमिगत बालुवा थिग्राउने पोखरीमा पुर्याउनेछ । र, सफा पानीलाई ५०३८ मिटर लामो सुरुङमार्फत भूमिगत सर्ज साफ्टमा पठाउने गरी डिजाइन गरिएको छ ।
उक्त पानीलाई लोक्पा नजिक निर्माण हुने भूमिगत विद्युतगृहमा खसाली ४५ मेगावाट विद्युत उत्पादन गर्ने कम्पनीको योजना छ । आयोजनाबाट उत्पादन भएको विद्युत १३२ केभी प्रसारण लाइन मार्फत ७ किलोमिटर दुरीमा निर्माण हुने नेपाल विद्युत प्राधिकरणको सबस्टेसनमा जोडिनेछ ।
यही कम्पनीले ८१ मेगावाट क्षमताको बुढीगण्डकी प्रोक, ९३ मेगावाटको बुढीगण्डकी, ८७ मेगावाटको सेतिनदी–३ जलविद्युत आयोजना अघि बढाएको छ । कम्पनीको २२.१ मेगावाटको चिलिमे जलविद्युत आयोजना सञ्चालनमा छ ।
