ऊर्जा खबर
काठमाडौँ । अछाम र सुर्खेतको सिमानामा ४०० केभी क्षमताको ५ किलोमिटर प्रसारण लाइन निर्माण हुने भएको छ । अछामको ढकारी गाँउपालिका–६ मा प्रस्तावित बेतन कर्णाली आंशिक जलाश आयोजनाको स्वीचयार्डदेखि सुर्खेतको चौकुने गाउँपालिका–४ मा राष्ट्रिय प्रसारण ग्रिड कम्पनी लिमिटेडले निर्माणका लागि प्रस्ताव गरेको बाघमारा सबस्टेसनसम्म उक्त प्रसारण लाइन निर्माण हुने भएको हो ।
बेतन कर्णाली सञ्चयकर्ता हाइड्रोपावर कम्पनी लिमिटेडले प्रवर्द्धन गर्न लागेको उक्त आयोजनाको बिजुली राष्ट्रिय प्रसारण प्रणाली लैजन उक्त प्रसारण लाइन निर्माण गर्न लागिएको हो । प्रसारण लाइनाबाट ४३९ मेगावाटसम्म विद्युत् प्रसारण गर्न सकिने बताइएको छ ।
यसका लागि प्रवर्द्धक कम्पनीले विद्युत् विकास विभागसँग अनुमति माग्दै आवेदन दिएको छ । विभागका अनुसार आयोजनाअन्तर्गत औषत २४१ मिटर दूरीमा पर्ने गरी ५० मिटर अग्ला ११ वटा टावरहरू निर्माण गरिने छ । टावर निर्माणका लागि १.१ हेक्टर र विद्युत् मार्गको क्षेत्राधिकार (राइट अफ वे) का लागि कुल २५.४३ हेक्टर गरी कुल २६.५३ हेक्टर जग्गा आयोजनाका लागि आवश्यक पर्ने कम्पनीले जनाएको छ ।
निर्माण सुरु गरेको २४ महिनाभित्र सम्पन्न गर्ने गरी अघि बढाउन लागिएको आयोजनाले कुनै उल्लेखनीय वातावरणीय असर गर्ने भए ३५ दिनभित्र लिखित राय तथा सुझाव पेश गर्ने विद्युत् विकास विभागले सूचना जारी गरेको छ ।
