ऊर्जा खबर
काठमाडौं । मेन्छियाम हाइड्रो पावर लिमिटेडले १२.४२ मेगावाटको विद्युत प्रवाह हुने १२.२ किलोमिटर लामो प्रसारण लाइन निर्माण गर्ने भएको छ । कम्पनीले उक्त मेगावाटको विद्युत प्रवाह हुने ३३ केभीको सिंगल सर्किट प्रसारण लाइन निर्माण गर्न लागेको हो ।
प्रदेश नम्बर १ अन्तर्गत संखुवासभाको चैनपुर नगरपालिकामा अवस्थित माथिल्लो पिलुवा खोला–२ बाट उत्पादन हुने ४.७२ मेगावाट र माथिल्लो पिलुवा खोला–१ जलविद्युत आयोजनाबाट उत्पादन हुने ७.७ मेगावाट विद्युत राष्ट्रिय प्रसारण प्रणालीमा समाहित गर्न प्रसारण लाइन निर्माण गर्न लागेको कम्पनीले जनाएको छ ।
कम्पनीका अनुसार प्रसारण लाइन माथिल्लो पिलुवा खोला–२ को स्वीच्यार्डबाट सुरु भइ माथिल्लो पिलुवा खोला–१ जलविद्युत आयोजनाको स्वीच्यार्ड हुँदै संयुक्त रुपमा सोही नगरपालिकामा अवस्थित नेपाल विद्युत प्राधिकरण्को बानेश्वर सबस्टेसनमा जोडिनेछ ।
प्रसारण लाइन निर्माण गर्दा २७७ वटा पोलहरु जडान गरिनेछ । जमिनको सतहबाट पोलको औसत उचाई ११ देखि १३ मिटर तथा पोलहरु बिचको औसत दुरी ५० मिटर देखि ६० मिटरको हुनेछ ।
आयोजना निर्माणकाे लागि ७.५८२ हेक्टर जमिन आवश्यक पर्ने अध्ययनले देखाएको छ । यो प्रसारण लाइन ६ महिना भित्र सम्पन्न गर्ने लक्ष्य रहेको छ । आयोजना निर्माण तथा सञ्चालन गर्दा भु–क्षय, बाढी, वायु प्रदुषण आदि द्वारा वातावरणमा उल्लेखनीय असर नपर्ने गरी निर्माण गरिनेछ ।
