ऊर्जा खबर
काठमाडौं । रसुवाको आमाछोदिङ्मो गाउँपालिकामा ७८ मेगावाटको सान्जेन जलविद्युत आयोजना निर्माण गर्न १३ अर्ब रुपैयाँ बढी लागत अनुमान गरिएको छ । आयोजनाको वातावरणीय प्रभाव मूल्यांकन (इआईए) प्रतिवेदन अनुसार आयोजना सम्पन्न गर्न उक्त रकम लाग्ने देखिएको हो ।
प्रवर्द्धक सालासुंगी पावर प्रालिले गरेको इआईएअनुसार आयोजना बनाउन १३ अर्ब १९ करोड ८ लाख ६० हजार रुपैयाँ लागत लाग्ने देखिएको छ । यो आयोजनाको यसअघि नै इआईए गरी निर्माण कार्य अघि बढाइएपनि आयोजनाको केही संरचनाहरू हेरफेर गर्नुपर्ने भएकोले पूरक इआइए गरेको कम्पनीले जनाएको छ ।
कम्पनीका अनुसार स्वीकृत इआइएमा भएको बाँधको लम्बाई १३ मिटरबाट १६.५ मिटर र उचाई २.३१ मिटरबाट २५ मिटर पुर्याउन लागिएको छ ।यसैगरी, हेडरेस टनेलको लम्बाई २५२ मिटर थप हुनेछ । साथै, टर्बाइन, सर्ज ट्यांक, पहुँचमार्ग पनि केही परिवर्तन गरेर डिजाइन तयार पारिएको कम्पनीले जनाएको छ ।
आयोजना निर्माण गर्नका लागि नेपालर सरकारबाट प्राप्त भोगाधिकारको जमिन १५.७० हेक्टर स्थायी तथा १२.१५ हेक्टर अस्थायी रहेकोमा अब १४.०२ हेक्टर स्थायी र १०.२३ हेक्टर जग्गा अस्थायी रुपमा आवश्यक पर्नेछ ।
यो आयोजनाको ५० प्रतिशत निर्माण पूरा भएकोले थप जमिन नचाहिने तथा संरचनाको परिवर्तन गर्नुपर्ने भएकोले इआइए गरिएको कम्पनीले जनाएको छ ।
