ऊर्जा खबर
काठमाडाैं । नेपाल विद्युत प्राधिकरणले अर्घाखाँचीस्थित ३३/११ केभी दुर्गाफाँट सबस्टेसन चार्ज गरेकाे छ । प्राधिकरण आयोजना व्यवस्थापन निर्देशनालयको वितरण प्रणाली सुदृढीकरण आयोजना अन्तर्गत निर्माण भएको सबस्टेसन बिहीबार लाेड दिएर चार्ज गरिएको हो ।
सबस्टेसनको ऊर्जा, जलस्रोत तथा सिँचाइ मन्त्री टोपबहादुर रायमाझीले उद्घाटन गरेकाे प्राधिकरण अर्घाखाँची वितरण केन्द्र प्रमुख किरण खनालले बताए । उनका अनुसार आयोजना अन्तर्गत निर्माण भएकाे मथुराबेंसीदेखि दुर्गाफाँटसम्म १५ किलोमिटर प्रसारण लाइनबाट सबस्टेसन चार्ज गरिएकाे हाे ।
‘सबस्टेसन पहिले नै नाे लाेडमा चार्ज गरेका थियाैं’,उनले ऊर्जा खबरसँग भने, ‘बिहीबार मन्त्री ज्यूले औपचारिकरूपमा उद्घाटन गर्नुभयाे ।’ प्राधिकरणका कार्यकारी निर्देशक हितेन्द्रदेव शाक्य पनि उद्घाटन कार्यक्रममा सहभागी थिए ।
सबस्टेसनबाट ३ वटा ११ केभी वितरण लाइन सञ्चालन गरिएकाे पनि उनले बताए । सबस्टेसनमा ३ एमभिए क्षमताको पावर ट्रान्सफर्मर जडान गरिएको छ ।
भर्खरै निर्माण सकिएकाे सबस्टेसनमा सन्धिखर्क सबस्टेसनको बढी भएको लोड सारेर आपूर्ति व्यवस्था मिलाइएकाे उनले बताए । यसअघि दुर्गाफाँट क्षेत्रमा सन्धिखर्क सबस्टेसनबाट आउने ११ केभी फिडरमार्फत विद्युत वितरण हुँदै आएको थियो । वितरण लाइन धेरै लामो हुँदा प्राविधिक चुहावटको समस्या थियो ।
दुर्गाफाँटमा सन्धिखर्क सबस्टेसनको लोड सारेपछि वितरण प्रणालीको गुणस्तरमा सुधार हुने अपेक्षा गरिएको छ । सबस्टेसन र प्रसारण लाइन १२ करोड रुपैयाँ लागतमा सम्पन्न भएको हो । सबस्टेसन र लाइन त्रिपुरेश्वर जयदूर्गे जेभीले निर्माण गरेकाे हाे ।
दुर्गाफाँट सबस्टेसन र वितरण लाइन वितरण प्रणाली सुदृढिकरण आयोजनाका १२ वटा प्याकेजमध्येको ९औं आयोजना हो । ३ आयोजना निर्माणाधीन छन् ।
.jpg)
