ऊर्जा खबर
काठमाडौँ । पेट्रोलियम पदार्थ उत्खननका लागि आवश्यक अन्वेषण गर्न पहिलो चरणमा उत्खननमा प्रयोग हुने उपकरणसहितका सामान दैलेख पुर्याइएको छ । चीनबाट कलकत्ता बन्दरगाह हुँदै रुपैडिया नाकाबाट नेपाल भित्रिएका सामान ५ वटा साना ट्रकमा राखेर पहिलो चरणमा दैलेख पुर्याइएको हो । उक्त नाकाबाट करिब १५० ट्रक सामान परियोजनामा लैजान लागिएको छ ।
परियोजनाको सामान लोड गरिएका ठूला ट्रकहरूका लागि भने कर्णाली राजमार्गको केही खण्ड र मध्यपहाडी सडकसम्म जोड्ने खण्डमा मोड नपुगेका कारण कर्णाली राजमार्गमै रोकिएका छन् । रोकिएका ट्रक पास गर्न सडकको मोड व्यवस्थापन गर्ने कार्य तीव्र पारिएको छ ।
नेपाल सरकार र चीन सरकारसँग भएको ‘जिटुजी’ सम्झौताअनुसार सुरु गरिएको पेट्रोलियम अन्वेषणको काम अघि बढाउन लागिएको हो । अन्तिम अन्वेषणका लागि करिब चार किलोमिटर जमिन मुनिसम्म ‘ड्रिलिङ’ गरिनेछ । ड्रिलिङ गरेपछि पेट्रोलियम पदार्थ र ग्यास भण्डारण कति छ भन्ने पत्ता लाग्ने बित्तिकै अर्को प्रक्रियामा जाने तयारी हुने खानी तथा भूगर्भ विभागका अन्वेषण परियोजना प्रमुख दिनेशकुमार नापितले बताए । अब अन्वेषणका लागि आवश्यक सबै सामान दैलेख पुगेपछि चौबिसै घण्टा काम अघि बढाइने उनकाे भनाइ छ ।
.jpg)