विद्युत आपूर्ति : प्राधिकरण :५५८० मे.वा.घन्टा / निजी क्षेत्र :४४३३ मे.वा.घन्टा / आयात : १७८१९ मे.वा.घन्टा / ट्रिपिङ :५० मे.वा.घन्टा / ऊर्जा माग :२७८८२ मे.वा.घन्टा/ उच्च माग :१४३६ मेगावाट
×

पेट्रोल प्रतिलिटर १ सय १६ रुपैयाँ पुग्यो, डिजेल, मट्टीतेल र हवाई इन्धनको पनि मूल्य बढ्यो

२०७७ फाल्गुण १७

काठमाडौं । नेपाल आयल निगमले पेट्रोलियम पदार्थको मूल्य बढाएको छ । निगमले राति १२ बजेदेखि लागु हुने गरी पेट्रोल, डिजेल, मट्टीतेल र हवाई इन्धनको मूल्य बढाएको हो ।

भारतीय आयल कर्पोरेशन (आइओसी) ले मूल्य बढाएको सूची पठाएपछि स्वचालित मूल्य कार्यान्वयन गर्न पेट्रोल, डिजेल र मट्टीतेलमा प्रतिलिटर २ रुपैयाँ बढाएको निगम प्रवक्ता बिनितमणि उपाध्यायले बताए । उनका अनुसार मूल्य बढाउँदा अब पेट्रोल प्रतिलिटर १ सय १६ रुपैयाँ पुगेको छ । 

यसअघि पेट्रोलको मूल्य प्रतिलिटर १ सय १४ रुपैयाँ थियो । डिजेल र मट्टीतेल ९७ रुपैयाँबाट बढेर ९९ रुपैयाँ पुगेको छ । हवाई इन्धन (आन्तरिक र अन्तर्राष्ट्रिय उडान) को पनि मूल्य समायोजन गरिएको उपाध्यायले जानकारी दिए ।

‘यो पटक आन्तरिक र अन्तर्राष्ट्रिय उडानतर्फको हवाई इन्धन महंगो भएको छ,’ उनले भने, ‘आन्तरिक हवाई इन्धनको मूल्य प्रतिलिटर ५ रुपैयाँ बढेर ७२ रुपैयाँ पुग्यो । अन्तर्राष्ट्रिय उडानका लागि प्रतिकिलो लिटरमा २५ अमेरिकी डलर बढेको छ ।’ मूल्य समायोजनपछि अन्तर्राष्ट्रिय हवाई इन्धनको मूल्य प्रतिकिलो लिटर ८ सय ९३ अमेरिकी डलर पुगेको उपाध्यायले बताए ।

यो मूल्य समायोजनपछि पनि वीरगन्जसँग सीमा जोडिएको भारतीय सीमा नाका रक्सौलमा भन्दा नेपालतर्फ पेट्रोल प्रतिलिटर ३५.९३ रुपैयाँ, डिजेल प्रतिलिटर ४२.०७ रुपैयाँ सस्तो रहेको निगमले जनाएको छ । खाना पकाउने एपी ग्यासको मूल्य भने यथावत राखिएको छ ।

पेट्रोलियम पदार्थको मूल्य बढाएर समायोजन गर्दा पनि पेट्रोलमा प्रतिलिटर ८.४२ रुपैयाँ, डिजेलमा प्रतिलिटर ६.५६ रुपैयाँ र एलपी ग्यासमा प्रतिसिलिन्डर ३९३ रुपैयाँ घाटा रहेको निगमको दाबी छ । 

पछिल्लो मूल्य समायोजनपछि १५ दिनमा पेट्रोलियम पदार्थको बिक्री वितरणबाट १ अर्ब ३२ करोड रुपैयाँ घाटा हुने निगमले जनाएको छ । आइओसीले हरेक १५ दिनमा पेट्रोलिय पदार्थको नयाँ मूल्य सूची पठाउने गर्दछ । आइओसीले पठाउने नयाँ मूल्य सूचीका आधारमा निगमले पनि मूल्य समायोजन गर्दै आएको छ ।

प्रतिक्रिया