ऊर्जा खबर
काठमाडौं । सिंगटी हाइड्रो इनर्जी कम्पनीले माघ पहिलो साताबाट साधारण सेयर निष्कासन गर्ने भएको छ । कम्पनीले दोलखामा निर्माण भएको २५ मेगावाटको सिंगटी जलविद्युत आयोजना प्रभावित क्षेत्रका स्थानीयका लागि छुट्याइएको साधारण सेयर निष्कासन गरेर बाँडफाँड गर्न लागेको हो ।
आयोजना प्रभावित क्षेत्रका स्थानीयका लागि सम्भव भएसम्म माघ २ गतेबाट सेयर निष्कासन गर्ने तयारी भइरहेको कम्पनीका सञ्चालक बटु लामिछानेले बताए । उनका अनुसार प्रभावित क्षेत्रका स्थानीयलाई छुट्याइएको सेयर बाँडफाँड गरिसकेपछि सर्वसाधारणका लागि सेयर निष्कान गर्ने तयारी छ । नेपाल धितो पत्र बोर्डले बुधबार सेयर निष्कासनको अनुमति दिएको छ ।
कम्पनीले निष्कासन गर्ने ४३ करोड ५० लाख रुपैयाँ मूल्यको ४३ लाख ५० हजार कित्ता साधारण सेयरमध्ये प्रभावित क्षेत्रका स्थानीयका लागि १४ लाख ५० हजार कित्ता छुट्यायएको छ । सर्वसाधारणका लागि २९ करोड रुपैयाँको २९ लाख कित्ता सेयर छुट्यायएको छ । स्थानीय र सर्वसाधारणका लागि छुट्याइएको सेयर स्वपुँजी लगानीको ३० प्रतिशत हो ।
‘हामीले एक वर्षअघि नै सेयर निष्कासन गर्ने अनुमतिका लागि धितोपत्र बोर्डमा आवेदन दिएका थियौं,’ उनले ऊर्जा खबरसँग भने, ‘प्रत्याभूतिकर्ता ग्लोबल आइएमई क्यापिटलको लापरबाहीले गर्दा ढिलो हुन पुग्यो ।’ उनले कम्पनीको नबिकेको सेयर प्रत्याभूति गर्न भएको सम्झौता ग्लोबल आइएमई क्यापिटलले तोड्दा १० करोड रुपैयाँ व्याय भार थपिएको आरोप लगाए ।
सेयर निष्कासन तथा बाँडफाँड गर्न मेगा क्यापिटललाई बिक्री प्रबन्धक तोकिएको छ । कम्पनीले लगानी गरेको सिंगटी खोलाको निर्माण सम्पन्न भई परीक्षणसमेत सकिएको छ । १३२ केभी सिंगटी–लामोसँघु प्रसारण लाइन पूरा भइनसकेकाले आयोजनाको विद्युत प्रणालीमा जोडिन सकेको छैन ।
प्राधिकरणले माघभित्र प्रसारण लाइन निर्माण सम्पन्न गर्ने प्रतिवद्धता जनाएकाले अब चाँडै आयोजनाको विद्युत जोडिने सम्भावना बढेको लामिछानेले बताए । प्रसारण लाइन समस्याले ६ महिनादेखि सिंगटी प्रणालीमा जोडिन सकेको छैन ।
.jpg)
