ऊर्जा खबर
काठमाडौं । अप्पर लोहरे हाइड्रो पावर कम्पनी लिमिटेडले साउन १८ गतेदेखि साधारण सेयर निष्कासन गर्ने भएको छ । कम्पनीले सर्वसाधारणका लागि छुट्याएको साढे १९ लाख कित्ता सेयर निष्कासन गर्ने तयारी गरेको हो ।
सर्वसाधरणका लागि १९ लाख ५३ हजार २ सय ७९ कित्ता सेयर निष्कासन गर्न लागेको कम्पनीले जनाएको छ । कम्पनीका अनुसार सर्वसाधारणले न्यूनतम १० कित्तादेखि अधिकतम २५ हजार कित्तासम्म आवेदन दिन पाउनेछन् ।
आवेदकले छिटोमा साउन २२ गतेसम्म र ढिलोमा साउन ३२ गतेसम्म आवेदन दिन सक्नेछन् । कम्पनीको सेयर निष्कासन गरी बाँडफाँड गर्न एन आईसी एशिया क्यापिटल लिमिटेडलाई बिक्री प्रबन्धक तोकिएको छ ।
कम्पनीले यस अघि प्रभावित स्थानीय र वैदेशिक रोजागारीमा गएका नेपाली नागरिकका लागि सेयर निष्कासन गरी बाँडफाँड गरिसकेको छ । कम्पनीकाे दैलेख जिल्लामा ४ मेगावाटको माथिल्लो लोहरे खोला जलविद्युत आयोजना निर्माणाधीन छ ।
