ऊर्जा खबर
काठमाडौँ । हाइड्रो इलेक्ट्रिसिटी इन्भेष्टमेन्ट एण्ड डेभलपमेन्ट कम्पनी लिमिटेड (एचआइडिसिएल) ले आफ्ना सेयरधनीहरूलाई चुक्ता पुँजीको ५.२५ प्रतिशत नगद लाभांश दिने भएको छ । कम्पनीको ३०४औँ सञ्चालक समितिको बैठकले गरेको सो निर्णय आगामी पुस २४ गते हुने तेह्रौँ वार्षिक साधारणसभाबाट पारित गर्ने तयारी छ ।
कम्पनीका अनुसार चुक्ता पुँजीको ५.२५ प्रतिशतका दरले हुन आउने १ अर्ब २८ करोड ९३ लाख ९० हजार २ सय २ रुपैयाँ नगद लाभांश वितरण स्वीकृत गर्ने प्रस्ताव छ । साधारणसभामा कम्पनीले गत आर्थिक वर्षको वार्षिक प्रतिवेदनमाथि छलफल गर्ने, गत आर्थिक वर्षकै वासलात, नाफा–नोक्सान हिसाब तथा सोही अवधिको नगद प्रवाह विवरण छलफल गरी पारित गर्ने लगायत विषय प्रस्तावको रूपमा तयार गरेको छ ।
साधारणसभाका लागि पुस १२ गते एक दिनका लागि कम्पनीको शेयरधनी दर्ता किताब तथा शेयर दाखिला खारेजीको कार्य बन्द रहने जनाइएको छ । पुस ११ गतेसम्म कारोबार भई त्यसको ३ कार्यदिनभित्र दाखिल खारेज कायम रहने सेयरधनीले मात्र साधारणसभामा भाग लिन पाउनेछन् ।
