ऊर्जा खबर
.jpg){kind=spacer}
काठमाडौं । १ सय ६६ प्रसारण लाइन आयोजनाले निर्माण अनुमति पाएका छन् । विद्युत विकास विभागले अहिलेसम्म ४ सय केभीदेखि ११ केभी क्षमताका प्रसारण लाइन आयोजनालाइ निर्माण अनुमतिपत्र दिएको हो ।
निर्माण सम्पन्न भएका, निर्माणाधीन र निर्माणमा जाने आयोजनाको विद्युत प्रवाह गर्ने उद्देश्यले सरकार तथा निजी क्षेत्रले प्रसारण लाइन आयोजना निर्माण गर्न अनुमतिपत्र लिएको विभागले जनाएको छ । विभागका अनुसार यी आयोजना निर्माणका विभिन्न चरणमा छन् ।
अनुमतिपत्र जारी भएका प्रसारण लाइनको क्षमता ४ सय केभी, २ सय २० केभी, १ सय ३२ केभी, ६६ केभी, ३३ केभी र ११ केभी छ । अनुमति पाएका ४ सय केभीका ४ प्रसारण लाइन आयोजना छन् । ढल्केबर–बित्तामोड, हेटाडा–ढल्केबर–इनरुवा, तामाकोसी–काठमाडौं, अरुण–३ रहेका विभागले जनाएकाे छ ।
हेटौंडा–ढल्केबर–इनरुवा डबल सर्किट प्रसारण लाइन आयोजना अहिले निर्माणाधीन छ । मकवानपुरको हेटौंडादेखि सुनसरीको इनरुवासम्म २ सय ८५ किलोमिटर लामो प्रसारण लाइन आयोजना निर्माण भइरहेको हो । प्रसारण लाइनअन्तर्गत ७ सय ९२ वटा टावर निर्माण हुनेछन् ।
तामाकोसी–काठमाडौं प्रसारण लाइन आयोजना पनि निर्माणाधीन छ । दोलखा, रामेछाप, सिन्धुपाल्चोकलगायत जिल्लामा उत्पादन हुने विद्युत काठमाडौं ल्याउन यो प्रसारण लाइन आयोजना निर्माण भइरहेको हो । यो प्रसारण लाइन निर्माण गर्न २०७४ कात्तिक २७ गते अनुमतिपत्र दिइएको थियो । सय किलोमिटर लामो प्रसारण लाइन पूरा भएपछि करिब ५ सय मेगावाट विद्युत प्रवाह गर्न सकिनेछ ।
भारतीय लगानीमा निर्माणाधीन ९ सय मेगावाटको अरुण–३ जलविद्युत आयोजनाको विद्युत प्रवाह गर्न ४ सय केभी प्रसारण लाइन निर्माण हुँदैछ । २ सय १७ किलोमिटर लामो प्रसारण लाइन आयोजना निर्माण गर्न विभागले २०७५ माघ २७ गते अनुमतिपत्र दिएको छ । यही प्रसारण लाइनमार्फत अरुण–३ ले उत्पादन गरेको विद्युत भारत जानेछ ।
यस्तै, २२० केभीका २२, १३२ केभीका ७६, ६६ केभीका ५, ३३ केभीका ५८ र ११ केभीका एक प्रसारण लाइन आयोजना निर्माण गर्न अनुमति जारी गरेको विभागले जनाएको छ ।
