ऊर्जा खबर
सुर्खेत । कर्णाली प्रदेशकी नवनियुक्त जलस्रोत तथा ऊर्जा विकास मन्त्री विजया बुढाले आगामी दुई वर्षभित्र कर्णालीका सबै घरमा बिजुली पुर्याउने प्रतिबद्धता व्यक्त गरेकी छन् । पदभार ग्रहणका क्रममा उनले यस्तो प्रतिबद्धता व्यक्त गरेकी हुन् ।
हाल कर्णालीका ८३.१३ प्रतिशत घरधुरीमा विद्युत् पुगेको बताउँदै उनले आगामी दुई वर्षभित्र शतप्रतिशत पुर्याउने बताइन् । दीगो विकास लक्ष्य–२०३० तथा संघीय सरकारले पनि दुई वर्षभित्र देशका सबै प्रदेश तथा जिल्लामा पूर्ण विद्युतीकरण गर्ने लक्ष्य लिएको बताउँदै बुढाले उक्त लक्ष्य प्राप्तिका लागि प्रदेश सरकार आवश्यक रणनीति र कार्ययोजनासहित अघि बढ्ने पनि बताइन् ।
उनका अनुसार दुई वर्षभित्र कर्णालीलाई पूर्ण विद्युतीकरणका लागि कर्णाली विद्युतीकरण कार्ययोजना–२०८१ तयार गरेर लागू गरिने छ । सौर्य मिनी ग्रिड आयोजना, लघु तथा साना जलविद्युत आयोजना निर्माण तथा पुनस्र्थापना र घरायसी सौर्य ऊर्जा प्रविधि जस्ता भौगोलिक बनावट अनुकूलका स्रोतबाट विद्युत् उत्पादन गरी लक्ष्य पूरा गरिने उनको प्रतिबद्धता रहेको छ ।
उक्त कार्ययोजना कार्यान्वयनका लागि तीन तहका सरकार र सम्बद्ध विकास साझेदार निकायहरूसँग समन्वय र सहकार्य गरेर अगाडि बढ्ने बुढाको भनाइ थियो ।
