ऊर्जा खबर
काठमाडौं । बैशाखयता ३ सय मेगावाट बढीका जलविद्युत आयोजनाले अध्ययन अनुमति पाएका छन् । निजी ऊर्जा उत्पादकहरूले देशका विभिन्न ठाउँमा पहिचान गरेका उक्त आयोजनाले अध्ययन अनुमति पाएका हुन् ।
वैशाखदेखि साउनसम्ममा ३१९.८ मेगावाटका ८ आयोजनालाई अध्ययन अनुमति दिएको विद्युत विकास विभागले जनाएको छ । विभागका अनुसार अनुमति पाउनेमा ३ मेगावाटदेखि १०० मेगावाट सम्मका आयोजना रहेको छ ।
अनुमति पाएकामध्ये सबैभन्दा ठुलो १०० मेगावाटको जिली चुम्ली खोला जलविद्युत आयोजना रहेको छ । सक्क्षम हाइड्रो पावरले जेठ ४ गते अनुमति पाएको थियो । यसैगरी, ८० मेगावाटको सुपर चुवा खोला आंशिक जलाशय आयोजनाले पनि अनुमति पाएको छ । यो आयोजना जेठ २३ गते अनुमति पाएको हो । यस्तै, ७२ मेगावाटको तपोवान सेती आंशिक जलाशय बैशाख १० गते अनुमति पाएको थियो ।
१४.९ मेगावाटको दराउदी/मर्स्याङदी आंशिक जलाशय, ९.६ मेगावाटको अप्पर इखुवा खोला, ३० मेगावाटको घाटगंगा आंशिक जलाशय, ३.५ मेगावाटको फेदी खोला र ९.८ मेगावाटको लुजा खोला क्यास्केड जलविद्युत आयोजनाले अध्ययन अनुमति पाएका छन् ।
