खाेला थुनिएपछि ५ मिनेट मात्रै आएकाे शक्तिशाली बाढीले १९ मेगावाटका २ आयोजनामा क्षति, एककाे मृत्यु, दुई बेपत्ता

काठमाडौँ । अविरल वर्षापछि बुधबार राती आएको भीषण बाढीले भोजपुरको उत्तरी क्षेत्रमा निर्माणाधीन २ आयोजनामा क्षति पुगेको छ । बाढीले आरती पावर कम्पनीद्वारा निर्माणाधीन १४.५ मेगावाटको अप्पर इर्खुवा खोला र ४.३ मेगावाटको फेदी थुलुङ खोला जलविद्युत् आयोजनामा क्षति पुगेको हो । पहिरोले थुलुङ (लाहुरे) खोला थुनिएको र थुनिएको ठाउँमा फुटेर एक्कासि ठूलो बाढी आउँदा दुई आयोजनामा क्षति पुगेको आरती पावर कम्पनीका कार्यकारी निर्देशक प्रकाश दुलालले ऊर्जा खबरलाई बताए । शक्तिशाली बहाबसहितकाे ठूलाे बाढी राती १२:०७ देखि १२:१७ बजेसम्म करिब ५ मिनेट मात्रै आएको तर ठूलो क्षति पुर्‍याएको उनले बताए ।  

उनका अनुसार घटनामा इर्खुवाको निर्माण कार्यमा खटिएका कामदार श्याम चौधरी र रमेश चौधरी बेपत्ता छन् । बेपत्ता मध्ये एक जनाकाे शव फेला परेकाे बताइएकाे छ । अर्का कामदार रामकुमार चौधरीलाई करिब १ किमि तल घाइते अवस्था भेटिएको छ । घटनामा एक स्थानीय महिला समेत बेपत्ता भएको बताइएको छ । हराइरहेकाको खोजीकार्य भइरहेको बताइएको छ ।

बाढीले अप्पर इर्खुवामा ५ सय मिटर पाइप, कामदारको शिविर, क्रसर बगाएको छ । विद्युत् गृहमा लेदो छिरेको छ । बाँध क्षेत्रमा सामान्य क्षति भएको छ । 

त्यस्तै, फेदीखोलाको करिब ७ सय मिटर पाइप एलाइन्मेन्ट बगाएको छ । त्यस्तै, विद्युत्‌गृहको सुरक्षाका लागि बनाएका ‘प्रोटेक्सन’ संरचना, कामदारको शिविर बगाएको छ । अन्य शिविरमा लेदो छिरेको छ । एउटा ट्र्याक्टर, दुई ओटा मोटरसाइकल, स्टोर र स्टोरमा रहेका सामान बगाएर तल पुर्‍याएको छ । स्काभेटरलाई लेदोले पुरेको कार्यकारी निर्देशक प्रकाश दुलालले बताए । 

बाढीले जिल्लाको स्थानीय झोलुङ्गे पुलहरू, मोटरेबल पुल, सडक, लघु जलविद्युत् आयोजना तथा लङ्खुवा, नागदह आसपासको बस्तीमा समेत पानी पसेर ठूलो क्षति पुगेको बताइएको छ ।