ऊर्जा खबर
काठमाडौं । राष्ट्रिय स्वतन्त्र पार्टीका उपाध्यक्ष समेत रहेको सांसद डिपी अर्यालले बूढीगण्डकी जलविद्युत आयोजनामा विदेशी लगानी नचाहिने बताएका छन् । गृह जिल्ला धादिङ पुगेका सङ्घीय सांसद अर्यालले सञ्चारकर्मीसँग कुरा गर्दै यस्तो बताएका हुन् । सरकारले बूढीगण्डकीलाई राष्ट्रिय गौरवको आयोजनाको सूचीमा राखे पनि त्यसअनुसार कार्यन्वयनमा प्राथामिकता नदिँदा आयोजना निर्माणले गति लिन नसकेको उनले बताए ।
‘सरकारले चासो र ग्यारेन्टी लिन पर्याे, अनि पो जनता ढुक्क हुन्छौँ’ सांसद अर्यालले भने, ‘त्यसपछि लगानी गर्ने वातावरण बन्छ अनि जनताकै पैसाले बूढीगण्डकी आयोजना बन्छ । विदेशी लगानी पनि चाहिँदैन ।’
आयोजनाको मुआब्जा वितरण, कार्यालय स्थापना र व्यवस्थापनका नाममा भ्रष्टाचार भइरहेको भन्दै उनले समय गुज्रदैजाँदा आयोजना बनाउन महँगो बन्ने सङ्केत देखिएको चिन्ता व्यक्त गरे । ‘बूढीगण्डकीलगायत ठूला आयोजना बन्नु भनेको देश समृद्धितर्फ लाग्नु हो,’ उनले भने, ‘तर भाषणमै सीमित हुनुभन्दा काम गरे पो देश समृद्ध हुन्छ । त्यसैले रोकिएका मुआब्जा दिएर काम अघि बढाउनुपर्छ ।’
धादिङ र गोरखाको मात्रै नभएर देशकै मुहार फेर्ने आयोजना निर्माणमा सबै मिलेर अघि बढ्न जरुरी रहेको समेत उनले बताए ।
