ऊर्जा खबर
काठमाडौं । मुस्ताङस्थित १३.६ मेगावाटको थापाखोला जलविद्युत आयोजनाको विद्युत राष्ट्रिय प्रसारण प्रणालीबाट बिच्छेद भएको छ । पहिरोले विद्युत प्रवाह हुने टुकुचेदेखि दानासम्मको ३३ केभी प्रसारण लाइनमा क्षति पुर्याएपछि मध्यान्ह १२ बजेबाट थापाखोलाको उत्पादन बन्द हुन पुगेको हो ।
विद्युतगृहदेखि १४ किलोमिटर दक्षिणमा गएको पहिरोले प्रसारण लाइनको पोल ढालेको आयोजनाका इन्जिनियर सुदिप भण्डारीले बताए । ‘पहिरो खसेर प्रसारण लाइनको पोल ढलेपछि उत्पादन बन्द गरेका छौं,’ उनले ऊर्जा खबरसँग भने, ‘प्रसारण लाइनको मर्मत गरेर सुचारु गराउन हाम्रो टोली परिचालन भइसकेको छ ।’
उनले पहिरोले क्षति पुर्याउँदा प्रसारण लाइनको ८ वटा पोलमा समस्या आएको बताए । २ वटा पोल ढलेका छन् भने बाँकी पोलको तार लत्रिएको छ । ६ वटा पोल ढल्ने अवस्थामा पुगेका छन् ।
नेपाल विद्युत प्राधिकरणको तातोपानी जलविद्युत केन्द्रका प्राविधिकको सहयोगमा लाइन मर्मत गरेर सुचारु गरिने पनि उनले बताए । लाइन मर्मत गरेर सुचारु गर्न मंगलबार साँझसम्मको समय लाग्न सक्ने उनले बताए ।
पूर्ण क्षमतामा चलेको थापाखोलाले अहिले १३.६ मेगावाट विद्युत उत्पादन गरिरहेको थियो । लामो समय आंशिकरूपमा चलेको यो आयोजना २०७७ चैत २ गतेदेखि दाना सबस्टेसनमा जोडिएको हो । २०७६ साउन २६ मा आएको बाढीले आयोजनाको बाँध क्षेत्रका संरचनामा क्षति पुर्याउँदा पनि आयोजनाको उत्पादन ६ महिनाभन्दा बढी समय बन्द हुन पुगेको थियो ।
