ऊर्जा खबर
काठमाडौँ । नेपाल विद्युत् प्राधिकरण धनगढी वितरण केन्द्रले ७ सरकारी कार्यालयसहित २५३ ग्राहकको लाइन काटेको छ । केन्द्रले एक महिनाको अवधिमा साढे १ करोड रुपैयाँ भन्दा बढी महसुल नबुझाउने ग्राहकको लाइन काटेको हो ।
केन्द्रले ६० दिनभन्दा बढी बक्यौता भएका ग्राहकको लाइन काट्ने कामलाई द्रुत गतिमा अघि बढाएको छ । बारम्बार ताकेता गर्दा पनि विद्युत् महसुल नबुझाएपछि ७ सरकारी कार्यालयसहित २५३ ग्राहकको लाइन काटेको केन्द्र प्रमुख मिथिलेशकुमार गोयलले बताए । उनका अनुसार उक्त ग्राहकबाट १ करोड ५३ लाख ४९ हजार ३६५ रुपैयाँ बक्यौता असुल गर्न बाँकी थियो ।
लाइन काटेका उक्त ग्राहकमध्ये १८० ग्राहकले जरिवाना सहित ७८ लाख ३६ हजार ४९१ रुपैयाँ महसुल बुझाएको छ । महसुल बुझाएका उक्त ग्राहकको भने लाइन पुन जोडिएको छ ।
यस्तै, केन्द्रले ६ लाख २ हजार ६ सय रुपैयाँ विद्युत महसुल नबुझाउने सात सरकारी कार्यालयको पनि लाइन काटेको जानकारी दिएको छ । नापी कार्यालय, अत्तरिया सडक विभाग, मालपोत कार्यालय लगायतले विद्युत महसुल नबुझाएपछि लाइन काटेको गोयलले जानकारी दिए । उनका अनुसार नियम विपरीत काम गरेको अथवा नियमअनुसार विद्युत् महसुल बुझाउन अटेर गरेपछि लाइन काटेको हो ।
हाल केन्द्र अन्तर्गत ७९ हजार ग्राहक रहेका छन् । केन्द्रले सयमा विद्युत् महसुल नबुझाउने ग्राहकको लाइन काट्दै जाने चेतावनी दिएको छ । विद्युत विनियमावलीमा मिटर रिडङ गरेको ६०औं दिनसम्म महसुल नबुझाएमा लाइन काट्ने व्यवस्था छ ।
