ऊर्जा खबर
काठमाडौं । नेपाल विद्युत् प्राधिकरणले उपकार्यकारी निर्देशक माधवप्रसाद कोइरालालाई एनइए इन्जिनियरिङ कम्पनी लिमिटेडको मुख्य जिम्मेवारी तोकेको छ । प्राधिकरण सञ्चालक समितिको मंसिर १२ गतेको निर्णयअनुसार उनलाई काजमा उक्त जिम्मेवारीमा खटाएको हो ।
सञ्चालक समितिले १२ गते निर्णय गरे पनि जिम्मेवारी सम्हाल्ने गरी उनलाई मंसिर १६ गते (मंगलबार) मात्र पत्र दिइएको छ । कोइराला हाल इन्जिनियरिङ निर्देशनालयको जिम्मेवारीमा छन् । सम्भवतः बिहीबार काज तोकिएको ठाउँमा हाजिर हुने उनले ऊर्जा खबरलाई बताए ।
यसअघि कम्पनीको मुख्य जिम्मेवारी (प्रबन्ध सञ्चालक) मा हितेन्द्रदेव शाक्य थिए । उनलाई काज फिर्ता बोलाएर प्राधिकरणको कामु कार्यकारी निर्देशक तोकेपछि कम्पनीको पद रिक्त थियो । कोइरालाले यसअघि लामो समय चिलिमे र यसअन्तर्गतका कम्पनीमा रहेर काम गरेका थिए ।
सेवा प्रवेशदेखि प्राधिकरणका विभिन्न आयोजनामा कार्यरत रहेका कोइराला २२ मेगावाटको चिलिमे आयोजनाको अध्ययनमा २०५० सालदेखि संलग्न रहेका थिए । चिलिमेको निर्माण पूरा भई विद्युत् उत्पादन सुरु भएपछि रसुवागढी जलविद्युत् कम्पनीमा काम सुरु गरेका थिए ।
रसुवागढी कम्पनीको विभिन्न जिम्मेवारी हुँदै प्रमुख कार्यकारी अधिकृतसम्म पुगेका कोइराला करिब एक वर्ष चिलिमे जलविद्युत् कम्पनीको प्रमुखको जिम्मेवारी सम्हाल्न पुगेका थिए । १२औं तह (उपकार्यकारी निर्देशक) मा बढुवा भएपछि उनी गत वर्ष मात्र प्राधिकरण फर्केका थिए ।
व्यवस्थापन तथा नेतृत्वमा निपुण मानिने उनी निर्णय क्षमतामा पनि उतिकै काबिल मानिन्छन् । एनइए इन्जिनियरिङमा गएपछि प्राधिकरणभित्रको इन्जिनियरिङ निर्देशनालय र चिलिमे इन्जिनियरिङ कम्पनीसँग पनि समन्वय गरेर काम गर्ने उनले बताए ।
अहिले एनइए इन्जिनियरिङले बेतन कर्णाली, फुकोट कर्णाली, जगदुल्ला, किमाथांका अरुण लगायत एक दर्जन आयोजना अध्ययन गरिरहेको छ । साथै, सुनकोसी–मरिन जस्ता बहुउद्देश्यीय आयोजना अध्ययनमा समेत सरकारलाई सघाइरहेको छ । पछिल्लो समय देशभित्र इन्जिनियरिङ (परामर्श) क्षेत्रको गुणस्तरीय विकास हुँदै गएको देखिन्छ ।
