ऊर्जा खबर
काठमाडौँ । स्वतन्त्र ऊर्जा उत्पादकहरूको संस्था, नेपाल (इपान) ले ऊर्जा, जलस्रोत तथा सिँचाइ मन्त्रालयलाई ४ थान टेलिभिजन सहयाेग गरेकाे छ ।
जेनजी आन्दोलनका क्रममा क्षतिग्रस्त भएका सार्वजनिक संरचनाहरूको पुर्ननिर्माणका लागि ऊर्जा, जलस्रोत तथा सिँचाइ मन्त्रालयको समन्वयमा सहरी विकास मन्त्रालय, संघीय सचिवालय निर्माण तथा व्यवस्थापन कार्यालय, सानो गौचरण, काठमाडौसँग भएको सम्झौता अनुसार बिहीबार ४ थान टेलिभिजन हस्तान्तरण गरेको हो ।
सिंहदरबारस्थित ऊर्जा मन्त्रालयमा मन्त्रालयका सह–सचिव रुद्रसिंह तामाङलाई इपान उपाध्यक्ष भरत खत्री र महासचिव बलराम खतिवडाले हस्तान्तरण गरे ।
टेलिभिजन ग्रहण गर्दै सह–सचिव तामाङले टेलिभिजनहरू सहायता गरेकोमा इपानलाई धन्यवाद दिए । महासचिव खतिवडाले ऊर्जा मन्त्रालय निजी क्षेत्रका लगानीकर्ताहरूका लागि सहजीकरण गर्ने थलो भएकोले आफ्नो दायित्व निर्वाह गर्ने क्रममा मन्त्रालयकै आग्रह बमोजिम सहायता गरिएको बताए
इपानद्वारा हस्तान्तरण गरिएका टेलिभिजनहरू मन्त्रालयको बैठक कक्षका साथै अन्य स्थानमा रहनेछन् । जेनजी आन्दोलनका क्रममा टेलिभिजनहरू क्षति भएपछि मन्त्रालयलाई बैठक कक्षमा प्रस्तुतीकरण लगायतमा समस्या परेको थियो ।
इपान उपाध्यक्ष खत्रीका अनुसार क्षतिग्रस्त सार्वजनिक संरचनाहरूको पुर्ननिर्माणका क्रममा सहरी विकास मन्त्रालयसँग समन्वय गरी क्षतिग्रस्त गृह मन्त्रालयमा रंगरोहणको कार्य अघि बढाएको छ ।
